النفوس الفقيره - مطلق بن شويه

الصدر روض أشواق والشعر نسناس
ميّل عناقيده وفوّح عبيره

ترايعت معه الحنايا والأنفاس
وتعطرت من سيرته كل سيره

والشاعر اللي مرهف شعور وإحساس
أدنا مايلمس خاطره يستثيره

حبيبتي إخذي علومي من الراس
بيض النوايا من بياض السريره

لاتضربين الظن بأخماس وأسداس
وتفيض روحك بين شرّه وخيره

ترخين سمعك والمقاريد الانجاس
من خلقت الدنيا على ذا الوتيره

يبغون وجهاتك تقلّب وتنحاس
ماهوب حبٍ فيك والا بريره

ناسٍ تدوّر رزقها من ورا ناس
وتصوّر الواقع بتصوير غيره

اقرب مثل يضرب عليهم وينقاس
اللي يقول لكل ساير مسيره

وظيفة العساس فالناس عساس
يجيب علم السيل من كل ديره

خلّي ظنونك ياكبيره على ساس
تبقين في عين الكبير الكبيره

تفائلي مابه حياةٍ مع الياس
خير الحياه العافيه والستيره

بشاعة الدنيا ورا حسن الأوناس
خدامةٍ تلبس لها ثوب أميره

أغلى من الياقوت واللول والماس
كرامةٍ تغني النفوس الفقيره

تعوّذي من كل نزغه و وسواس
وتطمني يا الجافل المستذيره

قلبٍ سقته كفوفك الحب في كاس
تبقين فيه الأوله والأخيره

أنتي قرينة كل فكره وهوجاس
وأنتي وليفة كل نبض وخشيره

الوصل غيمه والمعاليق يباس
قدام تدركنا العمار القصيره

ما أحر من عرض الشكاوي على الناس
الا الجفا بين العشير وعشيره

مسكت يدك وأخذت علومك من الراس
فيها لخرمان الغرام إتعميره

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر