الفقيره - ناصر القحطاني

يسعد صباح الفقر ياللي تذمينه
في ذمتي منتي من الفقر معذوره

ما شلت هم الرغيف اللي تشيلينه
كل الهموم لسواد العين مذخوره

منتي فقيره تقولين اليسر وينه
ياقطعة السكر من الملح ميسوره

من علم الجوري انشودة بساتينه
من هز ريش النعاس اللي كسا حوره

من ذكر الخيزران اللي نسى لينه
من جدل الليل لين اختال ديجوره

سلسالك الفضي اصلا لو تزمينه
ماراحت اكثره عقود الماس مغروره

والازرق الرث ياملحه ويازينه
ابهى من ارض نهار العيد ممطوره

مستورة الحال بس القاف تغيرينه
ليه اتنحى و اخلي الحال مستوره

والله لا اغني لفقر غنت سنينه
لين ايسر المترفات تموت مقهوره

قالوا لي ان الجديل اللي تربينه
معه تربين حلم فاحت عطوره

قالوا بذاك الركن سر تخبينه
ومرايه من رداة الحظ مكسوره

لا ينكسر مثلها الخاطر وتشقينه
تمنظري في المرايه حي هالصوره

مذكور جرح ورى الاظلاع تخفينه
وتحت المخدة رسالة عشق مذكوره

اثر الهوى جاء يسوق الشوق بيدينه
غصن جفا اليابس وزف عصفوره

يامن يكون الحبيب اللي تحبينه
ياللي بوجه الليالي ثروه وثوره

وقت مضى ملمس اللعبه تمنينه
واليوم خضر القلوب العاب منثوره

الحزن ليه العيون السود في عينه
والبحه اللي ترد الروح مذعوره

فقر ستير ولا ازكى من رياحينه
ولا نعيم فضوح تغرق سهوله

والميت اللي يبي دعوات حيينه
كنتي وصاته ونزفه وآخر شعوره

يازمة الغيم و رخياة هدب عينه
ما قلت لك ما انتي من الفقر معذوره

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر