ياهيه ياللي تحسب الوضع ساده
العقل نعمه والتكّبر زريه
والدين رحمة والعباده سعاده
والفضل لله والتغطرس خطيه
اسمع كلامي حسب نص الا فاده
وانت اعتبرها من صحيبك وصيه
الرزق قسمت ربنا في عباده
كلن عطاه الله قسمه عطيه
كلن حسب ما الله كتب له واراده
وانا رضيت بما تحوشه يديه
العبد لوّ رزقه يجي بإجتهاده
كانت بنوك الشرق والغرب ليّه
ومن غير ذالك كان عندي زياده
عماير اهل ادبي والفيصليه
وعندي وعندي في التجاره عماده
ومؤسسات كلها عالميه
وعندي على تجار لندن سياده
وتُجّار اهل باريس والبندقيه
وحطيت برج المملكة لي عياده
وسويت لي مضياف في العاذريه
وسويت شرهات وسويت عاده
وسويت مضمار الفرس والمطيه
والمستحق اعطيه وادفع سداده
اما عطا محتاج ولا هديه
كلن حسب ظنه وحسب اعتقاده
وانا على ظني شرحت القضيه
وليّت يا هذا الزمان ونكاده
كم من حلي قام يشذب حليّه
الادمي ينّحب حسب اقتصاده
اما . هنى . ولا حياةٍ شقيه
العبد لو حصل هواه ومراده
يمكن يموت وعلته داخليه
العمر يفنا والليالي مزاده
شبنا ودنيانا كماها صبيه
لولا التفنن في الذكاء والبلاده
ماصارت عقول الثعالب ذكيه
واللي غباه اصبح مغطي فواده
يبقى مكانه ضمن قوم غبيه
للي يدمر مجتمعه وبلاده
اكيد ماله عندنا قابليه
انا عرفت مزوّرين الشهاده
اللي تبث السم في الشاذليه
هبي عليهم ياسفوف الرماده
هبت عصير هب تالي عشيه
مالي وراهم صبح لليل وسواده
ذمتك ياخولان منهم بريه
ابعد عن اهل الشك واهل القراده
في يوم من الايام مالك هويه
البعد عنهم والتوّحد عباده
يكفيني اهل المعرفه والحميه
ربعن لهم بالطيب والجود عاده
على سلوم اجدادهم الاوليه
الدين فيهم والولاء للقياده
على كتاب الله وسنة نبيه
اللي يشاركني شرابه وزاده
واللي يدافع في غيابي عليه
دايم على الله منهجه واعتماده
هذا خويي واعتبرني خويه
عسى النسيم اللي يذعذع براده
عسى عبيره طم نجد العذيه

حقوق النشر محفوظة لـشاعر

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2004 - 2019 - موقع الشعر