حاضر ولبيه

لصار مالك من رفيقك مودّه
خله ولا تتعب على شان ترضيه

اللي معك ساعه وينساك مدّه
وزيارته لك يوم تفضى مخابيه

ماجاب له بين النشاما مسدّه
الله ولا رفقة رفيق المشاريه

هذا الذي مافيه لطيب ندّه
خله يدّور له حليٍ يحاليه

دور رفيق في اللوازم تعدّه
يفرح بشوفك وانت تفرح وتغليه

اللي يوّدك وانت مثله توّده
ومن غير هذا كل فرضٍ يصليه

لجاء لزوم بين الاجواد سدّه
تطرب لفزعاته وتطرب لطاريه

هذا على ما تملك النفس بدّه
ولا هو بلاقي غير حاضر ولبيه

ولا الردي ماله من العيب صدّه
حتى التشّّره لاحقٍٍ في عوانيه

اللي لبس له ثوب ماهو بقدّه
اما قصر ولاّ عثّر بين رجليه