العالم الثاني

البارحه ليلة ٍ ماهيب عاديّه
من بعد ما اخذتني للعالم الثاني

اخذتني في هواك .. شويّه شويّه
وسلّمتك زمام احاسيسي ووجداني

نسيت نفسي ولا ادري وش حصل فيّه
مادامني معك ( دروني ماتلقاني )

خششتني جو .. في جو الرومانسيّه
واصبح قصيدي لعينك / موقف انساني

شاعر ولا اخذت شعر الناس عاريّه
الشعر من فضل ربي رابع اخواني

ان كان ماللقصايد فيك ماريّه !!
والله لا احرّم طواريقي وقيفاني

لكّن لا تلحق الكيّه وراء الكيّه
تراي مجني ٍ عليّ وحبك الجاني

ارفق وخل المشاعر نارها حيّه
وايّاني ايّاك .. تذكرني وتنساني

غلاك له فالضلوع العوج محميّه
وآلله ل ( تشوفها ) كان الله احياني

مادام منزلك في هذي وهاذيّه
لاعاد تنشد عن الاجواد من داني

اخذ الغلا والمحبه والمحنيّه
وخل المقادير .. تكتبني وتقراني