على غبة محيط الشعر

على غبّة محيط الشعر حرّك مركب القيفان
تنطّح موجه العالي وداعب نسمة اشعاره

تحرك بالمثايل من هجوس الخاطر االطربان
ويبحث داخل اعماقه عن اللولو ومحّاره

هجوسي ياهجوسي طال وقتي والفرح ما بان
ليامنّي بنيت الساس عيّا يثبت اجداره

ليا مني صدقت الود بانت جفوة الخلان
عجايب يالغرام اللي عجزنا نقطف اثماره

اغمّض و اجحد الواقع وعدّي كن ماشي كان
واقول الوقت يتبدّل وخلي بقبل اعذاره

واقول ان الهوى قاسي ولايسلم من الاحزان
ولا نستعجل الاحداث والايام دواره

ولكن كل شي ٍ له حدود وطوّل الهجران
واشوف ان الخطا يزداد في حجمه و معياره

وبعد نزف الدموع اللي شكت من سيلها الوديان
وزفرات الضمير اللي توقد ماطفت ناره

تذكرت الصديق اللي يخفف لوعة الحرمان
صدوق ٍ في شعوره واعتلى بالقلب مقداره

صديق ٍ مثل طيبه ما انوجد في هالوجود انسان
انا اقصد وقتنا الحاضر وكل وقت ٍ له اخياره

اخصّه بالكلام وقدم عينه واضح البرهان
سهر واحزان والحر القطامي يفهم الشّاره

ياوافي كل مامديت كف الطيب ( جا)نكران
وش الحيله ترى مثلك حكيم ونتبع اشواره