هاجـوس قلبـي يتلنـه هناديـبـه - محمد عباس الطريفي

هاجوس قلبي يتلنه هناديبه
وامست هجوسي تراجعني واراجعها

ارتب الشعر واعرف كيف ترتيبه
واعسف بيوته على كيفي واطوعها

ادرى على قيمته واعرف مواجيبه
ماني بامثل بيوته واتصنعها

ياوقت ياوقتٍ فيك الشك والريبه
والناس فى الناس ضايعٍ روابعها

وياكثركم ياهل الدقات والغيبه
يااللي على الكذب والنمه تجمعها

كلٍ على طبخته يلحق مشاهيبه
ومضيع الدين والدنيا مضيعها

الله من واحدٍ حشوا عراقيبه
لوكان باالطيب شاريها وبايعها

والناس ماهي سوا والوضع داريبه
واعرف رجال الشوايع من شوايعها

من لايعرف الخبر وشلون اسوي به
ومن لايحضر الجنازه مايشيعها

وعزي لبيتٍ هبوب الصيف تومي به
تقلع عراويه واطنابه تقطعها

وكم واحدٍ نمدحه ونقول ياطيبه
نحسبه الى كبرت القاله يسنعها

واثره من الزود يخطي العلم ويصيبه
وانا احسبنه علوم الطيب جامعها

والكامل الله جليل الملك والهيبه
والناس تلقى اختلافٍ في طبايعها

وياليت كلٍ يميز في عذاريبه
قدم عذاريب خلق الله يطلعها

© 2024 - موقع الشعر