بداية ما اقول ارجيك يامقسم الارزاق - محمد بن دغيـّم السميري

محمد بن دغيّم السميري العتيبي
بداية ما اقول ارجيك يامقسم الارزاق

ياخلاق يامقسم على خلقه ارزاقه
انا ارجيك تنجيني من الهم ياخلاق

رجاك مخلوقٍ مارجا غير خلاقه
همومٍ اليا جا الليل ثلثين جات إتساق

والا واعنايه كل ماجات منساقه
ابا اشكي عليك الهم واشكي عليك إفراق

حبيبٍ لبيبٍ ماتحمّلت لفراقه
انا من فراقك ياوليفي ماعاد أطّاق

فراقك عذاب الروح وشلون ابا أطّاقه
وانا من فراقك دمع عيني هذا منراق

أهل الدموع اللي من العين منراقه
وليفي عروق القلب غادٍ لها حلاق

وانا ماسمحت ولا رضيت إلهن إحلاقه
تدرعت حبه لين طوّق حشاي اطواق

وغديت الاسير اللي عجز يطلق اطواقه
الا ياعيون اللي على راس هضبه واق

وشاف الحباري عقب مامرقبه واقه
عيونك عيون الاشقر الاقطم الصفّاق

خطيرٍ على جول الحباري تصفاقه
ولجنتك مزنة صيف والمبسم البراق

تحالي لمزنٍ يشتعل فيه براقه
وتحالين عفراً بكر بياضها لهّاق

وانا استغفر الله ماقدر آصفك بالناقه
وليفي عديم اوصاف في البر والاسواق

واليا من تبسم بسمته تشرق إشراقه
دقاق الوصايف غير جسمه ماهوب دقاق

ضخيم أسفله وأعلاه وخصوره إدقاقه
نحيف الخواصر لو بغيت آصفه مالاق

على وسطها الا وسط من جات سبّاقه
سهيفٍ لطيفٍ كل وصفه حلو ورقاق

رقاق الوصوف وغيره أخلاقه إرقاقه
هذاه الجمال ولو شرحت إلكم الاخلاق

خطير أنكم بكره تهذرون باخلاقه
عسى من حداني يامبارك عنه ينعاق

بعبرود بلجيكٍ يقديه تفاقه
تنقز عيونه رمية الصامل التفّاق

وتصبح عيونه عقب ماجاه منعاقه
لو انه عطانيها عطيته مهرها اطباق

عسى الله يجيه من السماوات باطباقه
ابا ادفع مهرها كل شعره بعشر إنياق

وابا انخا عتيبه وآخذ الناقه الناقه
© 2024 - موقع الشعر