حن قلبي حن جمسٍ دبتيني
يوم حن السير من جور المكينه
سايقه كن في دماغه حبتيني
لو تشوفه قلت جنٍ لاقطينه
يوم تله مايدور له عويني
والكلاشنكوف موجودٍ يمينه
قاطعٍ له هرج واردفه بيميني
مايوقف كون في ديره ظنينه
له زمانٍ فاقد سمح الجبيني
حال من دونه رجالٍ مانعينه
يشتعل قلبه من الجرح الدفيني
والرجال اللي وليفه مبعدينه
يوم وصل ديار فيها ساكنيني
قام عرق ابليس يقدح في جبينه
خاف من علمٍ يسر الشامتيني
ربع خلّه كلبوهم عارفينه
انتظر قال الاوادم سامريني
ثم جلس في راس رجم جاهلينه
يرتجف قلبه ويزداد الونيني
خايفٍ كون الجماعه سامعينه
يتوجد ما بقى الا خطوتيني
وزول خله مر من قدام عينه
يوم مرت عودها كنه يليني
بنت شيخٍ كل ربعه خادمينه
صيدته ما هي بصيدات الحصيني
مايصيد الا غزالٍ حافظينه
مثل ذيبٍ ما يصيد الا السميني
بس حد الذيب قوم فاطمينه
قام يقلبها يساره واليميني
عارف انه لو غزاهم صايدينه
قال ذولا وش بلاهم ساهريني
ما درو في النوم والراحه سكينه
وش بلاهم جعلهم شهب السنيني
لين يجدّب كل شعبٍ نازلينه
ثم على داري يسوقون القطيني
حيث مرعاها الخلايق ذاكرينه
زارها بالصيف رعادٍ رزيني
كن فوق الارض زلٍ فارشينه
بري حالي لو لفونا راحليني
بري حالي يوم داري قاصدينه
ثم يحلون بشنقنا راغبيني
في الديار اللي حماها حاجرينه
يوم عيدي يوم مابينه وبيني
كون خطواتٍ عددها حاسبينه
يوم عيدي يوم اشوفه كل حيني
يوم عيدي يوم زوله شايفينه
ما جداه الا التمني والحنيني
والهواجس طول ليله سايقينه
المغامر شين والمفلاس شيني
والهوى ملعون والفرقا لعينه
صار يالاجواد مكتوف اليديني
شوق عينه له رجالٍ حارسينه
ساهرٍ لين السفر قرب يبيني
ثم سرح والقلب دقاته حزينه
راجعٍ ع الدرب وفواده حزيني
من رجالٍ دون خله جارحينه
حالفٍ لولا هروج العاذليني
وصيت ربعه ما يظريها الغبينه
والعوايد والسلوم الواضحيني
تمنع الرجال من فعل المشينه
عارفٍ لو حده ابليس اللعيني
ان ذبح ولا النشاما ذابحينه
لكن انه من رجالٍ طيبيني
سلمهم نصف القبايل تابعينه
اعتزى ثم قال لابده يجيني
والله انا جايبينه جايبينه
ثم رجع يسحب طواريق الهجيني
الليالي حدته من نور عينه
ذاك حاله مثل حالي يا ظنيني
وانت ماتدري بحالٍ ناحلينه
السهر يانور عيني مبتليني
لكن انا لجل عينك ساهرينه
دام ثغرك سبته والوجنتيني
والله انا طايقينه طايقينه
لو حصل لي في لقاكم ساعتيني
الوعد يانور عيني حاضرينه
وما حسبنا للمعذرب والحصيني
وما علينا من مروجة الضغينه
والنهايه يالطيف الروح فيني
لا تسمع هرج ناسٍ ناقلينه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر