يا الله ياوالي على كل والي
ياخير من يدعا لكشف الجليله
المالك المعبود محصي الرمالي
الكون والدنيا ومابه فهي له
ما كان به أول وماكان تالي
ملكه يدَيّر به على مايجي له
يمضي ويقضي قادر ٍ مايبالي
والخلق ما تفعل بلا أمره فعيله
ماله شريك جل فوق متعالي
علمه أحاط بدقهتا والجليله
اشهد فلا غيره إله ِولالي
ربٍّ سواه أخشاه وأرجي لنيله
ياواحد ٍ فوق السموات عالي
من سطوته كل الخلايق ذليله
يافارج الشدة بضيق الحوالي
إفرج لعبدك يامنجي خليله
وإنظر بعينك يابا الأفراج حالي
فرد ٍ غريب والمصاغي قليله
وحيد مالي غير ظلك ظلالي
ذليل مالي غير عزك وسيله
ياراحم إرحم شيبتي وانخذالي
ياجابر أجبر عثرتي والفشيله
وألطف وناظر يالولي في سؤالي
لاتواخذن فيما مضا من فعيله
لاأخوان لاعمان لامن خوالي
ولامن صديق ٍبالورى نشتكيله
لو كان مايجلى سواء الله جالي
ما شفت عبد ٍهرجته لي جميله
تقطعت وذم العرى والمدالي
من جملة الخلان والمستخيله
وقضيت من المخلوق ماحد بقالي
إلا أنت يالي ما يخلي عميله
عادوني كل الناس شرق وشمالي
ولا بقا غيرك ذراً التجي له
شافون مذلول ٍ وحيد ٍ لحالي
ولا لي من الفزعات مومي شليله
وأنا بعون الله امتانٍ حبالي
متجود ٍ بحبال منشي المخيله
لو كان كلٍّ له صديق اموالي
اقراب واخوان وعزوة قبيله
أنا لي اللّي زابنه مايسالي
جزل العطا مبري الجسوم العليله
اليا دعوا حبانهم فز بالي
رفعت طرفي له وقمت اشتكي له
وإلى تنادوا بينهم للّنوالي
ناديت باسمك يامنجي دخيله
ومن لاذبك ماصار بالضيق تالي
يصير الاول لو اعظامه هزيله
أنا دخيلك ياعزيز الجلالي
حاشا كرم جودك يضيع عميله
بريت من غيرك بحالي ومالي
وزبنت أنا بحماك عن كل ميله
من شر خلقك لايذبك ولالي
لغيرك ملاذ ٍ شامخ ٍ ينعني له
يارب مالي غير جدواك والي
وان كان خليتن فلالي عقيله
يا عالم ٍ بالمخطية والعدالي
تشوف مالي غير عدلك وسيله
فلا تواخذني بماضي افعالي
يا ساتر العورات مضفي جميله
لو كان ذنبي راجح ٍ بالجبالي
عفوك عظيم ليس ذنبي عديله
أطلبك تقبل توبتي عن خمالي
وأطلبك عني كل كرب ٍ تزيله
وأطلبك تغفرلي وتصلح اعمالي
يا مزبن الخايف إلى باد حيله
مولاي لامنجا ولا ملتجالي
إلا انت ياللي مايذير نزيله
يافزعت المظلوم منشي الخيالي
يا فارج الشدات لو هي ثقيله
أفرج لمن بالحبس دونه رجالي
وابواب واقفال واحصون طويله
في وسط دباب ٍ غريب ٍ لحالي
أظلم ولادري وش نهاره وليله
متروك مالي من يرد المقالي
لاحد ٍ يبي قولي ولا أحد يشيله
ولا واحد ٍ غيرك عليه إتكالي
إلا انت يامنجي دريك الدبيله
مادام تنظرلي وتسمع مقالي
ماخاب عبد ٍ يدري انك وكيله
ياسامع ٍ بالليل حس النمالي
وتصويت يونس بالبحور الطويله
الماء وضرب الموج مثل الجبالي
فوقه أجيبت دعوته وتهليله
يامصرف الأيام هي واليالي
في قولته يجري القلم بتعديله
ادعوك باسماك العظام الجزالي
وابحق ماخصيت لك من فضيلة
وابحق عظمة قدرتك والجلالي
وابحق نورك والفعال الجميله
وابحق مانزلته اول وتالي
تجيرني من شر خلقك طويله
وتزيل كربات ٍ علنا ثقالي
تغطلست مالي سوا الله دليله
آمن على قلب ٍ يجتول بجتوالي
يا مسكن الروعات سكن جفيله
أسرع علينا يا قريب النوالي
لا تجعل الشده علينا طويله
يافارج الكربة بضيق الحوالي
أومر لعبدك بالفرج وتعجيله
وإجل الأمور المعضله والجلالي
عني وكل عبد مسلمٍ يندعي له
وصلاة ربي عد رمل السهالي
على نبي ٍ وضح الله دليله
صفوة قريش اللي مشى بالعدالي
نبينا المعصوم عن كل ميله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين