من دخل باب المحبه ما خرج

من يقول الصبر مفتاح الفرج ؟
كم صبر قلبي ولا آشوف انفراج

من دخل باب المحبّه ما خرج
أوّله (زمزم) وتاليه (الهماج)

للفكر خطوه وانا همّي درج
والرِجل معدن و قلبي من زجاج

والحزن في فهرس العمر اندرج
والفرح جرحٍ مجافيه العلاج

ومركبي لا من تعدّى مُنعرج
زاد موجه والبحر لا هاج .. هاج

والأمل خلاّني بوقت الحَرج
كنّي الريشه على كف العجاج

ما صفى جّوٍ ولا هم انفرج
وداخلي مطمع .. ورغبه .. واحتياج

والزمان أبكم .. وعمره ما هرج
والأصم ما يسمع لصوت احتجاج

من وقع وانشلْ .. يتمنى العرج
والعمى حِلمه .. رُبع ضوّ السّراج !