شاشة أحزاني - محمد الحلوان الشراري

على الذكرى خذاني الشوق وسافر بي لأعز إنسان
شريط يعرضة فكري على شاشة من أحزاني

عرض لي صورة الماضي وكن اللي جرى ما كان
على حبٍ طواة الياس والماضي وحرماني

رجع فكري ثمان سنين لا زوداً ولا نقصان
على ذاك الحبيب اللي جزى حبي بنكراني

على اللي بالهوى كانت وكانت تملك الوجدان
وكانت بس لا زالت هواي وقرة أعياني

خذت عقلي خذت فكري خذتني عاشقٍ ولهان
بكف وردف وعيونٍ هدبها هز وجداني

ذكرت الملتقى الأول ذكرت الصاحب الفتان
حبيبٍ كم وكم لأجله سهرت الليل وحداني

بذاك البيت أقابلها ورى الغرفة ورى الجدران
وكانت دايم تردد قصيدة حب بلساني :-

أحبك حب ما زلزل ل (( وضحا )) قلب ابن عدوان
ولا عنتر على عبلة سطابه نصف ما جاني

أحبك حب من قلبٍ تعذّب بالهوى وأنهان
فداك العمر كل العمر دام إن العمر فاني

غلاتك تكبر بقلبي وقلبي بالهوى غرقان
تمكن حبك بقلبي وزاحم دم شرياني .

ولكن دورة الدنيا أشد وأقسى من الطوفان
تدور أيامها وندور وتكشف وجهها الثاني

أنا مدري ومن يدري من اللي فرّق الخلان
وش اللي غيّر أطباعة وش اللي جاه يجفاني

قست مدري نست حبي أو إنه لفّني النسيان
حقيقة واقعة عالم بها ضيّعت عنواني

رمتني بالهوى وراحت وشبّت بالحشا نيران
رمتني تايهٍ حاير من المظلوم والجاني

يا ليت الشعر لو أكتب يذكرها بابن حلوان
يمين الله لأسطر بنور الشمس ديوان

وأزخرف من سنأ الغيمه ورق وإسم الغضي عنوان
ومن قوس القزح حبراً أزخرف فيه الألواني

وأوصي الطير لا غرد يغرد بأجمل الألحان
على شباك غرفتها عسى تذكر وتنصاني

غريبة كيف ينسى الورد شذى عطره على الأغصان
غريبة والغريب إنه نساني أو تناساني

بكيت وصورة الماضي يصورها لي الحرمان
بعد ما دارت الدنيا وشالت نصفي الثاني

© 2024 - موقع الشعر