بنت الرياض - مبارك نايف أبوظهير

بنت الرياض وخايلي برقْ بْسما روحي يلوح
من عالي الجهرا هتف بالحب يابنت الرياض

وإستوطن القلب الغلا بالرغم من كل الجروح
والروح بيّن في سواد احزانها صفحة بياض

إيه أنعشي روحي بحبك وإبني بقلبي صروح
وإسترسلي بث الحيا يومه رفيف الحب ناض

كم لي أعاني والأماني داخل فْوادي تنوح
كم لي وأنا في غربتي مابين واقع وإفتراض

قبل أعْرِفِك لو سولفوا بالحب أتحجج وأروح
عذري أحس ف داخلي رهبه وبالنفس إمتعاض

ياسيدة شعري فداك الشعر ياالوجه الصبوح
أزرع لك حروفي غلا وأهديك من شوقي فياض

منتي بْحاجه لإختباري واضح ٍ كل الوضوح
عمري وربي لو تبينه ما تلاقين إعتراض

فدوه لْعينك لو تبين الروح لك فدوه تروح
مادام لك قلبي هتف بالحب يابنت الرياض

© 2024 - موقع الشعر