على الدنيا السلام - مبارك الحجيلان

اعذريني ملت أيامي ومليت الوجيه
وما بقا غير اقصر العنوه وترشيد الكلام

لو هقيت ان الدجا ينقد على الطرف السفيه
كان رحت اسحب صوابي واشتكي بدر التمام

ولو لمحت العز يقفي من تحت حكم(ن) نزيه
كان زوجت الخيانة للي سموه الغرام

ما بقا في حزمة الامال حلم(ن) نرتجيه
يا أنا غلطان فيها أو على الدنيا السلام

اهجريني وش بغيتي من كلام مشتريه
من شقا نبرات عين(ن) تستمده بالمنام

ماعليك أنتي ملاك للأسف مالك شبيه
وإلا انا تشبهني الدمعه وكلمة يا حرام

أعتذارك حير أفكار الفهامه والنبيه
أعذريني بقطع المزنه وابرحل للغمام

الحمام وجدول اشواقي مع اللي محتويه
مابقت فيني جداول تحتضن سرب الحمام

أفهميني داخت القصه وأنا فكري وجيه
رحت أدور عن صفار الشمس في جنح الظلام

خابرك قلبك هلاك(ن) يشرب اللي يشتهيه
تبتدين الدرب من جرحى بلا أي اهتمام

احرميني من جفاف الزرع وأغصاني تبيه
شنهو فيها تقزر الدنيا وأنا جرحي حطام

دار همي يا همومي من قبل لا تسكنيه
ما عرف غير أعذب الضحك من ريق الكرام

اذبحيني لو بقا شوق(ن) نسيتي تطعنيه
وارسمي حسنك لغيري واتركيني بانقسام

ودعيني لو وداعك ما تحملني واجيه
واطلبه يترك شجوني تنهي الحلم المرام

والطموح اللي عرفته ما قدرتي تفهميه
هذا لو كنتي عرفتي كل عاشق مستهام

الهوى ليل(ن) حزين ما نويتي تحمليه
والهوى تاج الموده فيه حشمه واحترام

وأن بغيتي تسأليني عن غرام (ن) تعرفيه
لو تقولي كيف حاله قلت لك والله تمام

اعذريني مل شعري وأنا مليت الوجيه
وصرخت كل الجداول ما تبي سرب الحمام

© 2024 - موقع الشعر