مساجلة مع فواز الهفتاء - لفى الهفتاء

يقول لفى الهفتاء :
ألا يالقرم عبدالله تهيا ساعة المشوار

معك طرسً غدت منه الشمالية جنوبية
على منجوبة الألمان مرسيدس كما المحّار

ل(فايف زيرو وزيرو) (وإس إي إل) مارية
شبح ما جت بحب خشوم جبناها من الدولار

بعد جينا وكالاها بتسعينً من المية
بعث فكسً لمصدرها مترجم عاجل الأسفار

مضامينه نبي أحدث صناعة بنز دولية
اكسكيوزمي مستر (بلي) قفمي شبح استار

كراسيها من الديباج ولا اللون بحرية
بعد ساعة فقط رن الجهاز بمكتب السمسار

يخبرنا وصول الفكس والمضمون تالية
يقول أوكيه في عشرين أغسطس تاصل الأقطار

وأيضاً للشبح بسبورً ألماني وحاشية
وفعلا جت على الموعد عبر ميناء دبي وصار

كما هيبة عقيد البرلمان اليا عقد هية
هتفنا للشبح بيدين شعبٍ للمليك وقار

ولوحتها (ش ب ح) (101) (سعودية)
وصوت السلف يلقي بيت من عنتر على القيتار

يقبّل سيف كبارق ثغر عبله معانية
مراوحها كما الجوهر عبادي فوق خمس أوتار

يغني به فلكلورً تقاسيمه سبانية
يشادي كبسها لا دقه السايق مع الأسحار

عيون الجادل اللي صاح في عرسه قدم بية
نهارً زفها أبوها على عودٍ عديم الكار

وهي من شفها بين العرب تاخذ بناخية
وإذا قامت تهزع لعن أبوها تلفت الأنظار

كما اللي طب بالميدان يسحب بالدلع غية
يكد القذله الشقراء وعوده يلعبه مزمار

وضاع الساق بحجوله على دبكات شامية
وإذا سجّت سقاها الله كما اللي منتهض للثار

كما سالم صعاطيره تطاير من دماء خية
كما بنت العبية لا دعس عبدالله البيطار

ولبنّه شكامينً مثل لطم الحسينية
وكر وفر واستنفر كما جندي خفر لا سار

خلافه ضابطٍ اقشر أبد ما يدمح السية
وبالخط الممهّد برهنت قول الفلك دوّار

مشت من نجد في ساعه لهي وسط الصباحية
ألا يا رحم أبوها علةٍ تصعب على الرادار

كما بلقيس يومن جابه الجني بكرسية
حلال القوم راحن مثل كوسً فرقعن بالبار

كما سيلً من المولى رثع في قش شاوية
(فريق أول ركن صاعق مضلّي) لو أنا بختار

مسمى البنز والباقي كما جنودٍ حونشية
وحنا ذا العرب من قل ما نفهم فقط للقار

وعند الغرب برية وبحرية وجوية
وهي خير المواتر كان قالوا للدروب اخيار

وعبدالله خيار اللي يسوق العلم ردية
على (فواز ابن عمي) مع صبح الأحد مسيار

ليا من جاه طلسام المضرف فك خافية
وقله راعي المكتوب ذا يا وافي الأشبار

سنه والهم في قلبه يغني طاق طاقية
ليا من قلت ابكمي همً بعدٍ كما سنجار

ضرب بالقلب مهباشه وجاوب له خنينية
على اللي ضيم فرقاها يا بن عمي وفي قنطار

تماري لي عجوز الضيم يالنشمي بشومية
هنوفٍ دوبها كبت دلال القوم فوق النار

ليا شنت سباياها تجي نجدٍ حساوية
ليا من ضاق هاجوسي عطاني بن برَد بشّار

وأثرها كلما ضاقت لها ليلى الأخيلية
تجيني بالحيا حيلة وأحط إلها الكبار صغار

وتقعدني مجاديفٍ رمتها ريح شرقية
أخذت من الغضى صبري وفاح من الهشيم وبار

كما بالجوف مشعان الهتيمي شال مرثية
يا بن عمي ولد عمك ضحى ما بين نار وغار

يشيل الرمس فوق الخمس وسطه حربٍ أهلية
أنا ربي بلاني بالمحبة والزمن جوّار

على صدري قديمية وفي ظهري قديمية
يقولون الزمن غدّار يومن البحر غدّار

وأقول إن الهواوي ينكس البيضاء لهاوية
ولكن لا تعوّد قصةٍ من خيرها منهار

ولا وش بيّح المذكور دمه عند حورية
ألا يا صاحبي فواز يومن القصيد احوار

على ما اوحيت في قلبي تطر الجيب جنية
وأنا والله لو مامون ما جبت الكنين اجهار

ومثلك لا هقينا به بعيداتٍ هقاوية
ولكن زبدة الموضوع يومن الدروب اقصار

تجيب الحل يالنشمي ترى الأوضاع عكسية
وتمت خير ما نختم صلاة الله على المختار

محمد عد ما ذعذع صبا ريحً جنوبية
ورد فواز الهفتاء يقول :

أنا من ليلة البارح لذيذ النوم عني طار
أسج مع الطواري لين سرّى القلب طارية

تلافالي هواجيسي وأنا داور بها الأفكار
مواريد ومصادير الهواجس تخلف النية

وعقب ما عسعس الليل وتبيّن للصباح انوار
على جمر الغضى راكيت دلة بن برية

مبهرةٍ بهيل وزعفران وثالثه مسمار
مولمها لربعً ناصيين الدار طرقية

ومن زود الوله قمت أسبر الشارع ثلاث امرار
وعقب الثالثه جت تدرج صنع الفرنجية

شبح سواقها اللي جعل بية ما يمر النار
يا حي الشيخ عبدالله ومن مرسلك يا حية

هلا يا مرحبا ترحيبة تفرح بها الخطار
تراحيب الوفا والطيب مربوعة ومثنية

بمرسولً لفاني بالرساله من حدود الدار
ضحى يوم الأحد من مسندي جاب الخبر لية

تسالمنا واخذ فنجال وابدا موجز الأعذار
يبى الممشى وقال: ارسل لك الطوفان هاذية

واخذت الظرف واقفى , قلت: يا معبود يا ستار
وفتحت الظرف ثم قمت اتمالى كتب مطوية

لقيت بيوت شعرً تحترم من قالها الشعّار
بيوتٍ محكمة ما هي فقط وزنً وقافية

شكى فيها لفى غروً غلاه بوسط دمه سار
ليا منه طرا له بعدها صك الهجينية

وأنا من عادتي عن ماقفي ما بادل الأشوار
ليا من جالي المرسال ما طيبي بعارية

وقفت الماقف اللي يبهج الخاطر عقب ما احتار
يا كيف وطالب الفزعات من داني دوانية

ولد عمي ولا عن نخوته صده ولا معبار
ويبشر بالسعد والصعبه تْجيله طواعية

تولم يا محمد يا عضيدي واكتم الأسرار
إلك عندي مهمه يا طويل العمر سرية

توصل لك رساله فوق من لأسمه عليه اشعار
ثلاث حروف جابوها اختصارات انجليزية

على آخر مديلً صدّر اليابان للفكسار
بعقلً تكنلوجي من على لمسات سحرية

عقب حصر الصناعة (والأمم) في حالة استنفار
وعقد القمة (لكوفي عنان وبوش) فورية

صدر منهم قرارً بالتعهد من عليه اقرار
تكون صناعته ما هي لأي أغراض حربية

وبعد طبع النموذج سجلوا له بالصناعة (كار)
بعد ما هو مصنّف بالصناعة برّ مائية

وبعد ما وافقوا إنه يصدّر واغلوا الأسعار
نقل للمملكة عبر البحر بأول طلَبية

وبعد عشرين يوم من المحيط ارسى به البحّار
على ميناء بحر جدة بإسم صفقة تجارية

ومِد الجسر وإنِزل ثم نِثر من فوقه الأزهار
وغطى هالحدث كل القنوات الفضائية

تقل (عادل إمام) امسلمً (جائزة الأوسكار)
جميع الناس تهتف للمصنف بالنجومية

وحتى إنه صدر موجز عن الفكسار بالأخبار
وغير , وغير فقراتٍ مصوّرتٍ دعائية

فريد النوع لون ابيض تحير بشوفه الأنظار
إله هيبة مليكٍ تنتخيه شعوب مغزية

تنهّض شايشً تقدح عيونه مثل قدح النار
يبي رد اعتبار الجار دون حلول سلمية

أخذ من صممه بصناعته لأفكاره استثمار
وصمم من مخيلته تصاميم انفرادية

ليا منك فتحت الباب كنك كبتنً طيّار
دخل كبينت الأقلاع في رحلة مكوكية

واليا عدت النظر في داخلية ما عليه اغبار
عروش ملوك من سندس واستبرق حريرية

وليا دقيت سلفه كنه اللي يلهج استغفار
من التقوى يدوب اتميزه في همسة شفية

على شاشات طبلونه تقل صورة من الأقمار
يترجمها (حسن كرّاني) بنشرات جوية

وصمم داخلية كل آله أمرها بزرار
مكيّف لمس ومثبّت لسرعاتٍ جنونية

ومجهز في جهاز انذار وبصدامه استشعار
وفتحت سقف واسبيرين لأحوال اضطرارية

حلايا طاعته لدريوله مثل (الغلام البار)
مصخره الولي !! والجيب صنعه تكنلوجية

ليا منه سرى مع قار كنه قايدٍ مغوار
تذكر من قطع وجهه وداس ارضه لعانية

وليا طاف المواتر ينظر الها نظرة استحقار
ضحك (بالبنز والبي إم مع فورد المريكية)

صحيح إن المهمه ما لها إلا وارد الفكسار
ومحمد خير من يوصل (لبوخالد) معانية

لفى بيّن لي الخافي وثوّرت الكنين وثار
بعد ما قال همي له بوسط القلب حولية

وأقول إن خلك يا لفى حبك بقلبه غار
نبي نبدي لك المجهود ونجيب السنافية

نسوق الجاه كان إنه وقف من دونها حجّار
ونسوق المال كان إن أولياها (رأس مالية)

ونسوق اعمارنا لن كان وصلت بيعت الأعمار
على الفزعه نبيع اعمارنا منا طواعية

وكان صويحبك قفى بصده عنك واستنكار
ترى طرد المقفي عيب في سلم الهواوية

وأنا أدري فيك حرً يا (لفى) من ماكر الأحرار
وجاك الحل مني دام الأوضاع انسيابية

وصلاة الله على المختار عدد نوً يهل امطار
رسولا باعثه رب البشر لجل العبودية

© 2022 - موقع الشعر