مساجلة مع مانع بن شلحاط - لفى الهفتاء

يقول الشاعر / لفى الهفتاء :
يا هجوسي نفّدي جزل المعان وصرّي

لين ما تدبح لي خْيول الكلام الوافي
يوم أبو تمّام عوّد بالزمان مْعرّي

أجمعوا كل الملا ساعة حصل يا كافي
شفت (إبن شلحاط) عبر العيلمان الدُرّي

مقتدي عادي كذا بمعمّر القذافي
ساعةٍ ما قال لا رايم ولا متبرّي

عن ظلال الشجرة اللي تتعب الخرّافي
الله الله . يا مدوّر للمزاج البرّي

لا تقول إنك تواكب عالم النسكافي
شر قلبي صدق واللي عاد زوّد شرّي

كلمةٍ وش لون جت ضمن الجواب الشافي
ليت بن شلحاط عن بعض الحكي مدّرّي

ما طلع به عن مجال الغي والغريافي
كيف يدخل عالم الذرّة ولا هو ذرّي

شاعرً لأرض الشعر عدّه سحابة قافي
ينحسب مع راشدٍ والغيهبان المرّي

كوكبه خارج حدود الموقع الجغرافي
يسبح بحور القصيد وفي وغاه يكرّي

عمدة العجمان وقت القاف والميقافي
ما يجيب إلا القصيد الباذخ المتورّي

ينقشه نقش الذهب فوق الحرير الصافي
خابره هاجم قصيد العالم المجترّي

إحتمى الموروث عن سيف الكلام الهافي
يوم قال : الله يرحمني ولله درّي

إنتهض تكفى يا مانع كسّروا مجدافي
قلت والله لأفلجك يالخافق المحترّي

وأرفع أعلام النصر في قمّة المشرافي
عاد ودّوها لمانع بالبريد السرّي

ما تشيل إلا فقط بصمة لفى بن لافي
ورد الشاعر / مانع بن شلحاط :

هجرعت صوتي إليا أدوت طار كل الفرّي
من شجر ذاك الشعيب اللي تحت مهيافي

بحتي بالساحة العميا إتبيّح سرّي
لين ثرْت لكل شاعر من حدود إنصافي

مرحبا بالشاعر اللي قالطن متجرّي
قو قلبه يوم يمشي بالفتيل إخلافي

مير ما دامه تجرّا مرحبا لا طرّي
بن غيام إلا الفراوي أو لفى بن لافي

عاش بي عصر القريفة والقصيد امغرّي
غرّني لين أعتزيت بعصرنا العوّافي

يا لفى بعض الكلام اللي يقال مزرّي
مير برخي كتف بشتي لجل عين سنافي

مد كفك لإبن مبرد والقصيد مسرّي
وإلتفت للخس وأدخل فيلق الأشرافي

وصد عن شعر (الم...) والشعر لاعرّي
ما يغطي عورته بشت الأمير الضافي

أنت في ساحة قتال وبين كر وفرّي
أقلط بسيف الفغم يومه غزى الأسيافي

أنت لامست النجوم وكم بشتك زرّي
أحتم حدودك وانا اعرف وش مدا محرافي

وعقّب اللي ما فهم للدرس يومه قرّي
فاهي الأفكار عرّض سمعته للسافي

يا لفى دامك على سبك الدرر متضرّي
وصّل المحالسة شوقي وود إنجافي

قل لأبن حبيب نايف في غلاه مصرّي
ووصّل الهفتاء سلامً يشمل الأطرافي

من هبط لعكاظ يجلب والرجال تشرّي
فرق واضح بين أديب عكاظ والندّافي

ولأبترم روليت لعبك قل لبقعاء قرّي
أنت يا أخطل مطير أسرت كل شعافي

© 2024 - موقع الشعر