ياراكب اللي من الاشـواق مصنوعـة - قهر يزيد

ياراكب اللي من الاشواق مصنوعة
من مخمل الورد نجدنا مراتبها

تشرب خضار الطريق وتلغي رجوعه
ما ينزل الا بوسط القلب راكبها

سواقها في يسار الصدر موضوعه
شايل امانة يبلغها حبايبها

وليا وصل للديار وفاضت دموعه
واشتد نبض العروق بقلب صاحبها

يمشي الهوينا يجدد للغلا طوعه
يستمطر الروح ، يسعى في مناكبها

يحني جناحه ويبدي لوعة خضوعه
فوق الحنايا يوفّّيها مطالبها

صوت الضمير الصدوق يزلزل سموعه
والغش عقبان في ظهره مخالبها

من لهفة الفقد ولّع جمرة ضلوعه
من غيمة الشعر عذبات ٍ مشاربها

يروي ظماها سحاب البوح من جوعه
يقطف غلاها ويعصر من جوانبها

خمر ٍ زلال ٍ حلال ٍ فاض ينبوعه
عقل الفهيم الفطين اول نهايبها

تذهله عن وجهته وتصك مشروعه
تحبسه بين السطور وبين كاتبها

© 2023 - موقع الشعر