على تاريخها تصحـي العظايـم - قهر يزيد

على تاريخها تصحي العظايم
عظيمة أرخت فن الكتابة

قبيلة من شعر واللي يتساءل
يلاقي في دفاترها الإجابة

رحيمة و كفلت يتم القوافي
دفن فيها الشعر جرح اغترابه

و تزبنها و تنخاها المعاني
عتابة وا عتابة وا عتابة

ألا لب الندا واللي نصانا
نجاوب لهفته نرسل سحابة

ولو كانت مفازات وصحارى
فرشناها زهور ٍ ماتشابه

سقى الله من وقف دون البلاد ِ
واعلن لاجل نصرتها الحرابه

على من شق طوعه والمبادي
خرج عن دينه وبدّل ثيابه

لابو هذال عذبات التحايا
عسى الكوثر موارده وشرابه

طويل العمر شهّاد المواقف
نهلنا الفخر مع حضرة جنابه

حريقة رمدت صدر المعادي
يصالي نارها يشكي عذابه

الى وقّف تحييه الكواكب
تقبل كتفه وتعمل حسابه

تحرى طلعته شمس الهقاوي
تدفّى من حضوره والتهابه

( برقنا ) في عيون اللي يعادي
و( نروق ) ونحضن قلوب القرابة

إذا عدوا رمال في النفود ِ
وقف عنا الحساب وصك بابه

بحور الشعر غرقى في حمانا
وتخضع في منابرنا الخطابة

عتابة والفخر يوم نسبوا لك
خوال المصطفى فخرك بدا به

عتيبة والفخر لوما جذورك
تساوى في حضوره أو غيابه

عتابة يامواريث الملاحم
سيوف المعركة وملوك غابة

مجرة من نجوم ساطعات ِ
تزيح الكون عن غيمة ضبابه

ألا وارسل لهامتها سلامي
على قوس المطر جر الربابة

اذا منتي حبيبة كل عاشق
على ويش المحبة والصبابة ؟

واذا منتي قصيدة كل شاعر
تصير قصوره الشمّا خرابه

واذا ميراثنا منك الأسامي
حروف ٍ في معانيها تشابه

إذا محنا على الدنيا شهودك
نحفظ الورث في عز ومهابة

اذا ما تحفظ دمانا عروقك
عسى ماترتوي منها الذيابه

© 2024 - موقع الشعر