العاذل

لـ فيصل بن عويمر، ، في غير مُحدد

العاذل - فيصل بن عويمر

يا احمد بسولف لك عن القلب وشفيه
وابيك تسمع في قصيدي خفاياه

عن واحد ٍ قفى ولاني بناسيه
راحت به الدنيا ولا غاب ذكراه

لامن طرالي تالي الليل طاريه
من شافني في ضيقتي قال عزاه

تدري شسوي لاتذكرت ماضيه
رحت المكان اللي من العام جيناه

بيت ٍ جمعنا يوم غالي وغاليه
يوم المحبه توها وسط مرباه

كانت يديني ماتفارق اياديه
يوم السعاده والفرح في محياه

كان يتمنى لو دقيقه ماخليه
وكنت اتمنى باقي العمر وياه

لكن تركني وابعدت به خطاويه
وانا سهير الليل لاحل طرياه

الله حسيبه يوم غيّر مباديه
وذقت الشقا والويل من كف يمناه

طاوع كلام اللي من الناس شانيه
وروّح مع اللي تالي العمر تجفاه

لامرني بالدرب مقدر احاكيه
من عاذل ٍ جعل الشقا ماتعداه

عسى المرض والهم ميزه تخاويه
وعسى جهنم تالي العمر تصلاه

وعسى الولي في مايسويه يعميه
وعسى عذابه ماتخفف سواياه

وعسى يشوف الموت قدّمه يباريه
وعسى سهير الليل من عظم بلواه

وعسى يارب البيت محد ٍ يدانيه
حيثه حرمني من حبيب اتمناه

© 2024 - موقع الشعر