ياالله في نـو(ن) نصوبـه تزبـر - فهيد قاعد القرفي

ياالله في نو(ن) نصوبه تزبر
جعله على الوديان يرسي مخيله

من غب وبله يخضر القاع وانور
حتى من الخيرات تطلع نخيله

ياالله يااللي تعلم الخير والشر
واليا عطا يعط العطايا الجزيله

النوم اكبه لراع القرن الاشقر
اما يجيك الرزق والا تجي له

العلم لاجونا طروش(ن) من البر
عقب المسا ياخذ ليال (ن) طويله

نقدم لهم من غالي البن الاشقر
وتمر العياب اللي تقاود سليله

مع حايل (ن) ترعى الحيا حين يذكر
يجي بها الجلاب والا نجي له

الا ويامابي على البيت الاسمر
غب المطر مااحسن تخابط نزيله

اهل السخا واهل الدلال المنحر
ونجر(ن) ليادنوه يعول عويله

قناصهم يرمي الجواز المذعر
وعساسهم يبدي براس الطويله

ابوي ياحل(ن) لهم فات وادبر
اللي يشيلون الحمول الثقيله

سعد الركاب اللي من البعد ضمر
ياوي رجال(ن) وياوي حليله

هم فزعت المضيوم في اليوم الاقشر
لا صاح صياح(ن) وينخى القبيله

خيالهم فى الكون يدهش ويدجر
من فوق مزغاف(ن)يدوي صهيله

يروون حد الشلف باالدم الاحمر
بارماحهم والا السيوف الصقيله

تاريخ (هندي) من يمينه مسطر
مع مسلط البعاج حام الدبيله

والسكني اللي مثل سيل (ن) تحدر
على عدوه يوم ضيع دليله

من عقب صاف الجم ماهم تكدر
من بندق السكني براس النثيله

وناهض ولد سحمي له الطيب يشهر
فعله مع اهل الطيب نادر مثيله

لاد الحميدي سطوة السيف الابتر
صولاتهم تبرى الكبود العليله

وحنا البقوم اللي لنا البيض تنشر
كم شيخ قوم(ن) فى الملاقا نحيله

© 2023 - موقع الشعر