المهم الشوك يبعد - فهد معتوق

شفتها تسقي الورود و كل ورده تقول آنا
حتى الطف نبته و اجمل نبته في العالم تبيها

ليتني غصن ٍ تمايل بين عزّي و المهانه
و الله ان الشوك يبطي بالغلط يجرح يديها

ما يفوح الطِيب حشمه .. خاسر ٍ معْها رهانه
لن طيب الورد منها .. و طيبها منها و فيها

تلعب بعذب الزلال و كنّها ترجي حنانه
و لعبها عكر مزاجي و ثارت الغيره عليها

هو صحيح انّا افترقنا .. لكن الذكرى امانه
و اللي مثلي ذكرياته دروب ما يتعب مشيها

تركض الدنيا بعمري و قلبي ما يترك مكانه
دام ميلاده معاها .. لو مع الغير .. اهتويها !

من هبالي دايم اغلط .. و ازقر فلانه .. فلانه !
و انحرج معْ كل عذرا و غلطتي تقطع حكيها

قلبي لو يكتم اسمْها تفضحه زلة لسانه
حسبي الله عالمحبه .. و سامح الله والديها

القدر كمّل جميله .. و الهجر كمّل ثمانه
و ما قدرت اهوى سواها .. خايف اصغر في عِنيها !!

يوم انا طايش وفيت و ما دنيت من الخيانه
كيف يوم اني وصلت لهالعمر خاين اجيها ؟

الورود ادري لغيري و ادري تسقيهم عشانه
و ادري لو يزعل تضمّه و تحتويه بساعديها

بس انا قلبي أصيل و ما تأثر من زمانه
المهم .. الشوك يبعد .. ما يقرّب من يديها !

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر