تسعه تسعه سبعه

ما طلبت البعد انا لنّي اطيقه
و لا هو من طبعي اكابر بالتجافي

ماقويت فراقك بعمري دقيقه
كيف ابقوى عمري ؟ هذا شي خرافي

لكن اني شفتها حل و طريقه
الفراق ارحم من اللي كان خافي

ياما كان غيابك يسبب لي ضيقه
ما امسّ مْخدتي ولاّ لحافي

مثل مدمن و احرموه من النشيقه
لكن إدماني تماثل للتعافي

قلتها .. لو عاشق ٍ يجرح عشيقه
يتركه .. لكن لقيتك ما تخافي

لين صارت صدق .. و فراقي حقيقه
و الندم ما قد سمعت انه مشافي

اندمي .. بس لا تجي .. حتى صديقه
وقتك الأصلي انتهى .. مابه اضافي

وش يفيد ان جيتي و قلتي غريقه؟
و قلبي لْمنطق هواك اصبح مُنافي

مثل بيت ٍ شبّت بوسطه حريقه
و يوم ماتوا كلهم .. جات المطافي !!