فز يا ........ فواز...! - فهد بن عبدان

فز يافوّاز وصّلني المطار
ودي آخذ عند ربعي كم يوم

شغّل الموتر والى من صار حار
شيّكه .. مايطرب ان صار محروم

وحط غرضاني على السيت اليسار
من خلافك .. تحت علاّق الهدوم

ون وصلنا عند صالة الانتظار
قبل لاطير ( الكويتيّه ) يقوم

قص تذكرتي وكرسيّي جوار
شيخ ولاّ آمير ولاّ راس قوم

في بطن ( بوينغ ) ترسى فالغبار
وعن هبوب البرد تذريها الغيوم

كن هواها من مراوحها اعصار
في مكاينها من (الثوره) علوم

ماتحاتي الليل وأطراف النهار
تنتغر منها الكواكب والنجوم

مايقطّع عزمها طول المدار
وماتجفّلها لواهيب السّموم

كابتنها لايشاف ولايزار
والمساعد من حشيمته محشوم

قابض المقود .. معيّرها عيار
عين للعداد واخرى للرسوم

مايغّط ازرار ويخلّي ازرار
لين ترضخله وفي طوعه تروم

لاظهر من تحت تايرها شرار
فوق خطٍ ماتزفلت للعموم

واظهرت لمبات اطفاء الزقار
واقلعت يالله عسى نوصل سلوم

وحط مقْدمها على خط المسار
ياعسى عمره على الطاعه يدوم

كنّها طيرٍ خذا قسمه وطار
له على المسراح والمسرى عزوم

واستوت واستعدلت قالوا عمار
يامورّدها جعل ماانت مْهموم

عقب ساعه يعلن الكبتن قرار
ناصي الظهران اصحى لاتنوم

وتهبط في ديرة طوال العمار
( آل توّاه ) الصناديد القروم

لابتي ويحق ليّ الافتخار
دام بيرقها على روس الحزوم

يوم كانت انتصار وانكسار
الرجال رجال والذله رخوم

لالتقى الجمعين والدّخان ثار
والنتيجه بين هازم وامهزوم

الحرار اللي تسلسل من حرار
مايجون الاّ يسدّون اللزوم

فعلهم يطرب .. ميتّمة الصغار
دون عرض وأرض مافيهم رحوم

مايحطون الهنادي في الجفار
والعدو ماهو معقّل ومخزوم

ل / ستشاش اللي ملا راسه شنار
مايفر ولايصد ولايحوم

لادعى الحمرا وسرّجها وغار
ماعقب هجمته في الوقعه هجوم

أكرم من الجود .. منه الطيب غار
في العطا يمناه تشري ماتسوم

مايقلّط ضيفه الاّ والفقار
حقّه وقدره وسلم امن السّلوم

فالمواجيب الصّغار وفي الكبار
عند وجهك ماعلى شرواه لوم

فز يافواز وصّلني المطار
شاقني شوف الصناديد القروم

© 2024 - موقع الشعر