هات القلم دن الحبر والقراطيـس - فايح مسلط الفاضلي

هات القلم دن الحبر والقراطيس
واكتب بيوت ٍ محكمات منقاه

من هاجس ٍ لادق ماطاوع إبليس
قدم البداية بادي ٍ بسمك الله

ياللي مهوجس خل عنك الهواجيس
مابه جمل يمشي يدينه مثناه

ولايمشي وسط البحر فالغطاليس
ولاينردع سيل ٍ على درب منحاه

والبن مايحمس بليا محاميس
ولاتحمل الدنيا التعب والمعاناه

وأكثر صفاها للرخوم الدلابيس
لاقام حظ الخبل لالا ملالاه

ونسي الرفاقة لعنبو طبعه الهيس
يشيل نفسه ماش منصب ولاجاه

لو كان ماله فالمراجل تحانيس
شفته نفخ ذربه وله ناس تنصاه

وإن مال حظ اللي يجيب النواميس
لوبان فعله فيه ناس ٍ تناساه

مايذكرونه غير عقب المقاييس
يمكن يعدو واحده من سجاياه

ناس تحب التفرقة والحواسيس
ولاعاد يعرف بحرها وين ممشاه

قلته وأنا ماني رهينة كوابيس
لكن ممشى الوقت في عكس مجراه

أشوف فالدنيا وجيه ٍ معابيس
وتمشي لهم ممشى ً على كل مشهاه

وأهل الكرم لولا الكرم جو مفاليس
والمال عند اللي مشافيح ورعاه

اريالهم محفوظ مافاخت الكيس
ولامنهم اللي تنثر الدم يمناه

وحظوظهم كبر الجبال المراويس
وعلومهم أكبر من طويق وحذاه

واللي تبعهم مثل طباخ للفيس
يبغى المرق لكن ماهوب وياه

شاخوا وشيختهم تحتها هداريس
ولا البطل مايحسب حساب ذولاه

منهم جميع أهل المعرفة مكاويس
مامنهم اللي يبدي الرأي عزاه

عزيتهم من ضامري والأحاسيس
ليابغوا رأي ٍ تعود مجاجاه

واللي سكن جده وأبوه الدهاليس
اليوم مبنى العز قام يتهمقاه

واللي منول شرهم شر أباليس
اليوم كل رادع ٍ فالسماء ماه

يخاف من حدب ٍ رهاف مقابيس
تقصر عن الماجوب ولا تعداه

من سربة جوا له لذبحه حراريس
وأزروا يشوفونه ومن دونه غشاه

قدامهم يمشي غشاهم نواعيس
وكل ٍ على رأسه مثل قدره أعطاه

ثم عودوا يم القبائل معاويس
خابوا جبابرة ٍ ملاعين وطغاه

وأختم كلامي عد نس النسانيس
صلوا على اللي وامر الغيث نجاه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر