يا اللي تسوي بالسوالف جماله
من العام مابان لسوالفك برهان
اثرك مثل نوّن يهيض خياله
ومن يارده مظمي صدر منه ظميان
والحمل ما يبرك له الاجماله
جمال التخوت المنوبه مثل سحمان
بعض الاوادم مثل صفرالجماله
بالحكي واليا قرب الحمل حيران
وسحمان لا قرب له الحمل شاله
وينقل حمول غير حمله بليهان
حمل اعشره منهم يشيله لحاله
ولو ضاعفوه اضعاف ماهوب بحلان
سحمان هجسي للمديح انتحى له
حيث ابوخالد فيه للمدح ميدان
في مدحه الشعر يتوسع خياله
يلقا به افياض خصيبه وريضان
من طيب فعله كل ماجا مجاله
تنعم له عتيبه وشمر وقحطان
بذال فالماجوب غالي حلاله
وشراي تيجان الفخر باغلى الاثمان
طود تزبن قمته من لجا له
لعتا الزوابع راسين مثل حوران
في لاهب الجوزاء ايظلل ظلاله
وفالبرد به للاجي كهوف واكنان
لاراحله من ضيق الوقت باله
منيوب ولا ظاهده دين ديان
يواسيه ويخلص مشربك حباله
ويجلا عماسه عقب ماهوب عمسان
بالجود وبطيب السجايا بنى له
مجد ٍ ومجد ٍ وارثه ورث جدان
ماشاد بنيه فوق جرف هياله
مشيده على قواعد وسيسان
خصب الجناب اللي عطايا شماله
اكثر من اكثر ماعطت بعض الايمان
فدح الخصوم الخير اللي هلاله
نوره يغطي شمس غيره ليابان
بوسع صدر معه من الاحنف وكاله
وجا بالكرم خليفة ٍ لابن قطنان
وفالسمؤال عاصبه عن عياله
ومن الدها والعرف والعقل شبعان
الطيب لو انه يجي بالسهاله
ماصار فالعربان طيب ورديان
الطيب كيفه ما تبهر دلاله
بالهيل ويلقم بها بن خولان
فنجال كيف الطيب كدر ٍ زلاله
واحيان يلقى به طعم سم ديبان
الا لبو سلطان صاف ٍ حثاله
ودايم وهو عليه مظرم وخرمان
ياالله عسانا ماندور بداله
حتى يصيرون المواليد شيبان
وجميع من يبخل بجاهه وماله
لعل يومه قبل يوم ابوسلطان

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر - بواسطة شركة المبرمجين