الشيخ/راكان بن خالد بن سحمان

مع اول ظهور سهيل والشاعر البطران
ينمي هواجيسه ولا احدِ ينميها

على طاري الذكرى تحرك صدى الوجدان
ليالِ لنا ياشيخ قفت لياليها

اشوف العرب تضحك وانا خاطري عمسان
اجيب السعاده مير حظي يوديها

تجرعت بعض الحزن والهم والحرمان
وفعال البشر ماهي اطابق مباديها

طموحي تهدم مثل ماطاحت الالمان
على سابق الهيبه تلاشت امانيها

غدة ساحة الصدر المشقا من الاحزان
علومِ تكدرها وعلم يوديها

ولولا حديث الشرع والصبر والايمان
مداني كرهت النفس واصبح معاديها

ادور من الاوطان بيت وله سيسان
على الارض يانفسي وشوفي ضواحيها

على ديرة اهل العز والخير والاحسان
اسوق القدم والرجل تاصل حراويها

تحرك من الخفجي على وادي العجمان
على مركز مليجه عسى الغيث يسقيها

وانا جيت اخو(لجعه) كبيرِ من العربان
ونفسي ليا جيته تحقق مساعيها

لواني ولد راكان ماني ولد راكان
لكني نصيت اللي عهوده يوفيها

ياراكان بن خالد وجيتك يابن سحمان
تخاويني الضيقه واذا ضقت اخاويها

ياشيخ الكرم والعز والمجد يابليهان
يارمز الشهامه والوفاء وانت راعيها

ياغيث المطر يالبرق يالراعد الحنان
ياراس الطويله وانت قمة معاليها

يانجم السماء ياكاسب الشكر والعرفان
ياوجه السعاده يالسعاده وطاريها

ياشيخ المروه والعروبه لكم عنوان
ورجلك على الطولات دايم مضريها

ياروح الفخر والصدق ياقايد الفرسان
ياملهم بيوت الشعر يا اصدق معانيها

ياراس الجبل ياطويق ياهيبة السلطان
ياذروة سنام الجود يابعد هقاويها

ياسيلِ تحدر وانهمر داخل الوديان
فعالك بدون قصور محدِ يجاريها

ياسيف الشدايد رافعك ربي الرحمن
عسى الله يسويها قبل ماتسويها

وحنا خوالك نكرم الجار والضيفان
خوالك خوالك لالفتلك تحييها

خوالك بني هاجر هل الطيب ياكحيلان
هل الخيل والخسران منهو يعاديها

وخالك فهو(ماضي)مع العز ذكره بان
فعوله مع الاجواد حن نفتخر فيها

أليا قلت يا(ماضي)طرى سيدي لقمان
حكيمِ شجاعِ هامته مايوطيها

امطلق ماحبيسِ عقب سطوة السجان
امعتق رقابِ بعد مالله يحييها

وبيت الشعر ماهو بيتِ بلا عمدان
ولا احدِ يميت النفس ياغير واليها

اهز الجريد ولاتساقط من الاغصان
سوى حبةِ طاحت وعيني تراعيها