مثل ناكر جميل - غازي بن عون الرويس

والله إنَّا غدينا اليوم بآخر زمان
استوى بآخر الدنيا الغبي والنبيه

الملا اللي سوالفهم تبي ترجمان
حطهم وقتهم في منزلة سيبويه

واستوى باخر الدنيا البغل والحصان
واستوى القرش في تال الزمن والجنيه

فيه بالدين وبقدر الوطن يستهان
وبيع فيه العهد ويباع دم الوجيه

مثل ناكر جميل ٍ عاهد الله وخان
ومع سفاهه ومع جهله يسمى الفقيه

والفقيه اللذي يُعرف بذمَّه وامان
وانته احقر واذل انسان واسفه سفيه

ويا سفيه الفقيه اللي يصون اللسان
ما يهينه ولا يعق به والديه

مطلق ٍ بالظلايم للسان العنان
فاجر ٍ ما تخاف الله ولا ترتجيه

تقذف الابريا في كل نشرة بيان
صار قول الخنا مطيتٍ ممتطيه

ولو طلبنا على قولك شهود العيان
راح قولك هوى غربان ما تحتميه

ولو فحصناه ما يصفي من الفه ثمان
وحتى الاطفال من سخافته تزدريه

كل عاقل كلامك يسمعه بالاذان
يدرك انه ضلال ومفتر ىً تفتريه

ويا سفيه الفقيه اللي بقلبه حنان
ما يروم الغريب وينفر امه وابيه

يوم قلبك عليه الغل والحقد ران
باع دينه وداره وابن عمه واخيه

ولا يخاويك في مسراك يالبهلوان
غير بالونةٍ عقله لعقلك شبيه

ديك روم ٍ على الخاوي تجر الاذان
ومن يكبَّر معك لا أذَّنت تبَّت يديه

ومن يعاف الرفاع وينحدر للطمان
خاين العهد بالاقدام ندعس عليه

بعت دينك ودمك للعدا يا جبان
عارضه فالمزاد وجاك من يشتريه

بعته اعدا العرب واللي مخفَّى يبان
ومصلحتهم وجودك عندهم تقتضيه

اشتروك لهدفهم وجعلوا لك مكان
يوجهونك وتنبح كنك الكلب فيه

عاقدين ٍ عليك الانقليز القران
ويلعبون بضميرك لعب كورة بليه

وهم لهم قصد واضح من قديم الزمان
وانت عندك خبر مير انت مانت بنزيه

اليهودي هم اللي سيسوله كيان
واعدوه وعطوه المطلب اللي يبيه

وانت حتى ايش لوحطيت لك مهرجان
حكمنا العادل العامر حشى مايجيه

غير كعامت العايل طوال اليمان
وغير خدام بيت الله ماحد نرتضيه

قبلهم والوطن مافيه لامن ولامان
تسرح وتمرح الفوضى والأحداث فيه

ويوم بادي قمرهم فوق الاوطان بان
حكمو فيه بالعدل الزعيم وبنيه

حكمنا خاتمه في يد كبير الخوان
ومن رحل سلَّمه للنايب اللي يليه

وراح سبع ٍ عجاف وجا سنين ٍ سمان
وسَّهل الله لنا جميع مانمتنيه

بعد ما زهر بها الحوذان والقحويان
يسَّرو للمواطن كل ما يشتهيه

وعد ما سارت الاقلام بين البنان
خاتم الانبياء اصلي واسلم عليه

© 2023 - موقع الشعر