ياهل الونيت اللي عزمتوا مسيان
للشرق من قطر ايسر الغرب ناصين
تجملوا بن ياطليقين الايمان
وريضوا على شاني ولوكان عجلين
وليا كتبت ابيات شكر وعرفان
امشوا عساكم للسعادة ملقين
طريقكم يبرى لبيبات مروان
وليا وصلتوا ظلم جاكم طريقين
درب يروح يسار من دونعردان
ودرب يروح يمين يوطا الشيابين
بين العواصم عبدوه اهل الاحسان
لاهل اللزوم وللحجيج الملبين
في الدرب الايمن للمسافات نقصان
روحوا يمين اقرب لكم ياميامين
ولا من برج العاصمة قدامكم بان
تعدوا الحي الموالي للاقصين
تلفون شيخ في ربا الفخر سكان
اهل الفخر في الفاخرية مبنين
عنده قرا الضيفان من قرح الضان
يبهج كبود اللي من البعد لافين
ولا دار مايجلا ضرم كل ضرمان
مدوا جوابي للوفي يالوفيين
ولاوصلتوا المكتوب لابن شعيفان
ياهل الوفا وافين منتم بهافين
شيخ سلايل شيخ من روس شيخان
بنك الجمايل من شيوخ الجمالين
بعض الاسامي للمخاليق تبيان
قبيلة على الجمايل مسمين
ماسميوا من بدة الناس جملان
غير لسلفهم بالجمايل براهين
ولولا الخلف فعل السلف راح هموان
مير الخلف مع درب الاسلاف ماشين
ومسلط ورث جدانهم عاداتهم ورث جدان
واحيا فعول اللي بالجداث فانين
الخط يكتب له على الظرف عنوان
والفاهمين العارفين اللبيبين
يدرون بالعنوان في وجه الانسان
والجود له في وجه مسلط عناويين
اسمع فعول الشيخ مسلط بالاذان
ولا اقتنعت الا بعد شفت بالعين
ليا عنى له واحد فيه له شان
يقابله قبل القرا بالنبا الزين
من جا محله راض لوكان عجلان
وفضايله يلقونها المستحقين
لاجاه معسور من الدين غرقان
عانه وخفف عنه دين الديايين
من لابة يوم المغازي والاكوان
لديارهم بمذلق الحد حامين
مسكانهم جميع في ماضي الزمان
بين النفود وضلعها والشعيبين
من غرب حد ديارهم خرص وضعان
ويحدها من شرق دار القحاطين
وجنوبها من يم شهران خلدان
وشمالها ثلاث شدات من تين
حادين عنها الناس من عصر بدران
وراسين ولطلابة الدين مضحين
ويوقرون الجار كرمان شجعان
ودهاة ثقاة ثقال خفيفين
خفاف النفوس اليا لف الدار ضيفان
وان زارهم خصم لقاهم خفيفين
للصاحب احلا من لبن حم الامعان
وعلى الاعادي كايدين غثيثين
ويوم اجدبت وديانهم والدهر شان
قسم رحل منهم وقسم مقيمين
اللي قعد منهم حصون للاوطان
دون العشاير والجباير راسين
وقسم تحدر بالسبايا والاضعان
يمشون في مشهاة رثم العرانين
محوالهم مابين خنزير وذقان
وحطوا سدير يسار والعارض يمين
وفاضوا على دار عذية وجيان
وغزوا عمود البيت بين الحفيفين
مابين مطران وخوالد وعجمان
استوطنوها غصب ماهم راضين
لولا فعل خضر النمش وادهم الزان
ان كان فيها ماستقروا زمانين
خذوا لهم دار ماهلها برديان
لكن جاء الشجعان ربع شجيعين
خذوا من الحاير لنا جو ساقان
وفي الحاير الهم فيه غرس وبساتين
ساروا بها ليومه قبايل وسلفان
وهم يوم جوها من ديرهم قليلين
وسبيع قسمين اهل حرة ووديان
والقسم الاخر باسفل الدار ناجين
مبطين حنا والعلويين جيران
وبالطيب سلونا عن الربع الادنين
حنا وهم ورعان واليوم شيبان
عند الكرم مكرمين عزيزين
احسب هل الوديان مامثلهم كان
واهل الحفر ورماح عنا بعيدين
ومن شوفتي فعل بعضهم بالاعيان
اشهد بشوف العين ماهو بتخمين
به قصة مفروض ينشر لها اعلان
وتحط للقارين من بين قوسين
قصة عبيد اللي ذبح حيل سمان
والضيف داره وين ومضيفه وين
وان كان قبل العلم ماهوب وكدان
شهودها الحضار خمسة وعشرين
ولو قالو احكم بينهم صرت بحلان
بين الحدارية وبين العلويين
وازريت افضل منهم احد على الثان
بفعل الامور الطيبات متساويين
ياكثر مافيكم من الطيب سبعان
على الكرم كن الكرام متواصيين
وختامها عداد ماهل ودان
صلوا على الهادي خيار النبيين

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين