مرحوم ياشيخ الجبل ريف الاضياف
ياالماجد اللي مال جوده نهيا
اللي لطرق الجود والمجد ميلاف
وعلى بقايا مجد الامجاد عيا
اللي من الاجداد في شخصه اوصاف
اهل المكارم والوفاء والحميا
اهل العطايا مروية حد الاسياف
ملاجي المضيوم شيخان طيا
لراياتهم في قمة المجد رفراف
وفي ظلهم شاكى الهجير يتفيا
وطلال عدا في حجا كل مشراف
ويطمح لمصعاد القمر والثريا
وصوف النجابه فيه كلٍ لها شاف
وهو في زهور العمر توه صبيا
بالجود له شف" نفل كل الاشفاف
ماهوب غمر" يقنعه ماتهيا
أبحر بيمٍ هايجٍ ماله اطراف
تلاطم امواجه مهبة عتيا
اله الصبر دانوق والعزم مجداف
مواصلٍ سيره صباح وعشيا
لين انه احيا مجد الاسلاف واضاف
لامجادهم مجدا طليق المحيا
والموت دربٍ للبشر يابو نواف
وماصار للمؤمن من الله محيا
واللي يخلى الفجعه اضعاف الاضعاف
موتتك يابحر الندى هالسويا
واللي يخلينا كثيرين الاحساف
موتك على ايدين الخوارج كذيا
واللي جعلنا نفرك بطون الاكفاف
موتك كذيا ماوخذ بك قضيا
ولو منهم اخذنا لك فراش ولحاف
انت وسواد الناس مانتم سويا
وقتلك غدر يدم الضماير والالجاف
تقتل على ايدين الخوارج بريا
اللي لهم في ماضي الهجره اسلاف
اللي قتل عثمان واللي عليا
واليوم يقتل فالجزائر بالالاف
ومنهجهم الخاطي وصلنا هنيا
يبون بأسم الدين تحقيق الاهداف
وبدوا بتفجير الخبر والعليا
وفجّر بغرناطه مهين وحلاف
وبشبيليا ومجمعات المحيا
ويااللي هرم جودك على النايفه ناف
الموت مكتوبٍ على كل حيا
عساك فالماوى بجناتٍ لفاف
يحط لك فيها مكان عليا

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين