عاشر سنه... - عياد الشمري

مليت اشوف اني (اخو)وانتي تشوفيني (حبيب)
مليت اشيل بداخلي بركان دمع واسئله

يابنت ماني لك اناولا انا لي.. بي نصيب
القلب مقفي بالوجع وانتي تجيني مقبله

الأرض أرضي والسما عيني واحس اني غريب
والحب ماعادت ضلوع الجوف تقوى تحمله

باسباب من عاشر سنه من فقد رَبْعي مستصيب
وباسباب من عاشر سنه الحب اصبح مهزله

عصفورة ٍ جيتي تبين الورد والغصن الرطيب
حلمك كبير وتحلمين انك عروس مدلله

ياليت لك في داخل الصدر المحطم والعطيب
صدرٍ ولا اني اذهل اللهفه بعينك واقتله

الكذب في فرصة عمر اخف من حبّة زبيب
اقدر بكلمه خاطفه اكذب تهون المسئله

لكن ورب الكعبه ورب السماوات الرقيب
عندي ضميرٍ لا هدا.. الروح هذي ينخله

روحي مثل من قال عن شرقه ابي يم المغيب
انايبست من الفراق وعمرك انتي بجمله

روحي عسى دربك مثل عينك فضاءات ورحيب
انسيني بدربٍ عرفت اقصاه يومي باوّ له

لي بالجهات الاربعه درب ٍ يودّي مايجيب
اجيه امنّي به رِجِل وعيون سود واسئله

تمت الإضافة بواسطة:عبدالله العجمي...
© 2024 - موقع الشعر