وادي حنيفه..

اليوم ابو نواف ماعاد يتبصّر للبريق
الشمري عياد..عياد (الوداع) الشمري

اليوم احس ان الفضا في داخل عيوني يضيق
ماأحتري..لا..أحتري ..من احتري من احتري!!

وادي حنيفه دلّني من وين ابي ضاع الطريق
ماعاد تفرق ماأبي ألقى كثير من اكثري

مليت.. من ليت وتعب مليت واحساسي حريق
مليت ..من صمت انتظار الصمت مليت انبري

خلاص ..ماباقي من الدنيا حبيب ولارفيق
يعني ولا باقي من الدنيا وضوح ٍ ينقري

ابمشي لْحالي.. ولا حالي على حالي تويق
حتى أنا مابي أعَرْفْ اني أنا في معبري

الشمس حاديها غفى والليل يصدح : ياغريق
تسمع ياقلبي وش يقول الليل ..ياهو يزدري

شبّيت لك ضلعين ياقلب العنى.. حاول تفيق
اجلس وحسّّب وش ورى الوقفات.. والحب البري

ولو اني ادري ماعلى التحسيب لك نفس ٍ تطيق
ولو اني ادري ماعلى التحسيب لك عزم ٍ جري

تدري ..! أبكتب لي على معصم يدي بيت ٍ طليق
وارجع لدرب ٍ مفتري روحَهْ ورجْعَه.. مفتري

وادي حنيفه ....ماتحسّفت برجوعي ..لاتضيق
جيت اقبر فوادي على جالك .... وناسي دفتري.

تمت الإضافة بواسطة:عبدالله العجمي...