منخل حظوظي

كم حَدا في صحصح القلب شوق وكم حَدا
طاري ٍ لوقلت ابنسى ذكرتك يا اوّلي

وكم يموت وينولد ليل في وجهي فدا
قلت انا لعيونك اللي لها وحشة هلي

مايطيح مْن الغلا الا خفيفه لاغدا
والغلا باقصى المعاليق جرح ٍ مختلي

يا اجمل اجمل ذكرياتي على طول المدا
ما عطتني فيك الايام حق ٍ مجزلي

جفّت ورود التلاقي على صبر النّدا
والخريف احكم جهاته وثوبه مسبلي

من رحيلك مابدا غير وجدي وابتدا
للجدي رسم المسافات عين ومكحلي

تطري انت وانثني نازف جْروح اضْهدا
قمّة حضوري مع الناس قمّة معزلي

يرحم الله ساعة ٍ كنت انا وانت سْعدا
ويلعن الله ساعة ٍ ما تجيبك مقبلي

كذبة الفرقا سهمها على الجوف اهتدا
ولو اصدّق ما اصدّق ولكن تنطلي

ألف ميلي يا طريقي ويا قَلْعة ْ مدا
في نهاياتك نهايات وش غيّبتلي !

كيف ابرجع عن طريق آخره ما من جدا
وكيف انا اسكن لاغدت غربتي في منزلي

آه يا هم المشاوير والناس حْسدا
قاسي ٍ تفسير حلمي وحلمي مخملي

منخل حظوظي تبنّا مواثيق الردا
ما مسك لو بعض الاحباب!! يلعن منخلي

مابقا غير السهر في عيوني وارتدا
همّه بروض المحاجر مقام ومدهلي

لاصفق عوج المحاني من الماضي نِدا
طاحت براس الخطاوي جنوب ومشملي

تمت الإضافة بواسطة:عبدالله العجمي...