الاوله باسم الله أبدا واتكل به واستعين - عوض القوانه العازمي

الاوله باسم الله أبدا واتكل به واستعين
الواحد اللي رحمته كل البشر تسعى لها

رب الخلايق مهلك الحيين محي الميتين
عالم خفيات النفوس وعالمٍ باحوالها

اللي بعث فينا بنور الهدي سيد المرسلين
يدعو جميع الخلق تصرف للاله اعمالها

والثانية أصغوا لقولي واسمعوا يا سامعين
قدم العلوم الباقيات قصارها وطوالها

يا مرحبا ترحيبةٍ تشمل عموم الحاضرين
أقولها والرّبع مثلي كل واحد قالها

بضيفونا واصحابنا واربوعنا والزايرين
بحضور مقدمهم ليال الخير هلّ هلالها

ترحيبةٍ ما تنمحي طول الليالي والسنين
ولا تزول الا ليا زالت رواس جبالها

عداد ما تذر الهبايب من شمال ومن يمين
واعداد ما يمطر مطرها من صدوق خيالها

باسم العوازم كلبوهم حاضرين وغايبين
ربعٍ يضيفون الضيوف ويكرمون سبالها

في حلةٍ دايم ترحب بالرجال الوافدين
الطّيب طبع رجالها والهيل كيف دلالها

والعود الأزرق والشحم والبن الاشقر والسمين
تكمل حقوق الطيّيبن الله يطّيب فالها

الجود ميراثٍ لاهلها من عصور الاولين
من عدّها من جدّها من عمّها من خالها

في حفل شيخ القوم ارحب بالنيابه مرتين
باسمه وباسم القوم بالحفله ومنهو جالها

شيخ العموم اللي ليا مني ذكرت اسمه بين
ابن تويلي موفي الكيله على مكيالها

راع الوفا والطيب والوقفات والعقل الرزين
كل الصفات الطيبة شيخ القبيلة نالها

لو كان عن مدح العرب مغنيه رب العالمين
واجب عليّ انزّل اهل الطيب في منزالها

ذوي تويلي قصرهم مبني على ساسٍ متين
اهل البيوت النايفات اللي يظلّ ظلالها

روس الرجال الدينين الطيبّين الطاهرين
ما تشتري حب الرجال ومدحها باموالها

افعالهم تشهد لهم والله وخلقه شاهدين
تثبت ليا حان اللزوم أقولها بافعالها

شجرة وفا ما تثمر الا الطيبين الخيرين
والطيب توصي به عيال عيالها وعيالها

عد المراجل واردينه من زمان وصادرين
ما ياردون الا العدود اللي طوال حبالها

الله يكافي ربعنا الغالين شرّ الحاسدين
جعل المعزّة حظّها عسى السعد يبري لها

مذخور عود جعل خده في جنان الخالدين
الله يجيره من عذاب الآخرة واهوالها

اخو حميد اللي جمعها كلها دنيا ودين
ماهوب من ناسٍ تصر جنيهها وريالها

دون العوازم باذلٍ نفسه وعزمه ما يلين
وان ثقلت الحملة على ربعه برك واشتالها

يشتالها ويقوم بالدعوى له ربه عوين
ولا للحمول الكايدات الا ظهور جمالها

يفزع ليا جات اللوازم والقبايل خابرين
ما ملّ من كثرة معداها ولا محوالها

ما قام في دعواً كبيرة غير باذن الله تزين
يحسب لمظهار الدعاوي من قبل مدخالها

شيخٍ قضى عمره على الطاعة وفي قلبه يقين
زيزومها اللي يرتكي لخفافها وثقالها

جاهد على الدنيا بعقل وحكمة وقلبٍ فطين
وليا التوى حبل العقل جا للعقد حلاّلها

كم من حبيسٍ فك قيده واطلقه وهوه سجين
لا قام في دعواه فك مغلقات اقفالها

الله يبيحه ويغفر له مع خيار المومنين
في ماقفٍ تحصى الفعول دقاقها وجلالها

اقولها في حفل ربعي هالحين وكل حين
واحرص على اللي مثلها واتعب لها واعني لها

مدحت ربعي والقبايل كلبوهم طيبين
في كل ديرة حقها من طيبها ورجالها

كل القبايل غالية هذاك خشم وذاك عين
تشريفها الدعوه جميله جمل الله حالها

واليوم حنا في ذرى الحكام حامين العرين
آل السعود اهل الشداد مطوّعة عيالها

ننعم بعدل وامن وبخير ومحبة عايشين
الله يوفقها السعد في اقفايها واقبالها

إخوان نورة عزنا في ظلهم حنا آمنين
عدواننا ما في يديها حيلةٍ تحتالها

في خدمة اللي يخدمون الدين حنا مخلصين
طول السنين اشهورها وايامها وليالها

ما همنا قول العداه الحاقدين الطامعين
اللي لمرحان الفتن دايم تشّد رحالها

حنا هل التوحيد والدّين الحنيف المسلمين
نحمي وطنا والعدا نقضي على آمالها

والبلبله والشوشره جدوى الضعوف الحاقدين
واهل الضغاين والحسد لو تستريح اشوالها

شعب وحكومة كلنا فالمملكة متكاتفين
ما نلتفت فاللي تهسّ عن الطريق لحالها

مدام حنا بالعقيدة كلنا متمسكين
يبكي عدو الدين حسرة رغبته ما طالها

يالله وحنا سائلينك يا مجيب السائلين
تجيرنا سوّ الفتن بالوانها واشكالها

يا سامعين القول قولوا عقب تمّ القول آمين
الله يعز المملكة في ظل حامي جالها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر