بـــ يعود ؟ - عقاب الربع

ان ماكبر ياحمود وشلون ب يعود
عطني صبر .. مابي سؤال واجابه

هذا السهر بحري وحزني بلا حدود
قل أي شعر وازيد هم ورتابه

خبيت له في هجرته.. شعر .. ياحمود
ينوح شوفه مثل نوح الغلابه

الشعر يشكي حبر واوراق وقيود
حزين يحمله القلق ب الكتابه

تسأل طواريقه هكالطفل موجود؟
يتبع حياته والحياة بسرابه

يشتاق زيه زي أي قلب موعود؟
في ساعةٍ فيها المواجع تشابه

خذها على المسحوب مابالسهر فود
من هيض جروح الصبي ي الربابه

صغيّرٍ مع بيض الايام مفقود
يطيش ما شافت عيوني شبابه

ليت الحضور يكون لو غاب مردود
عشان مايجتاحني في غيابه

قفى ورى طيش الصبا يطرق العود
شح ب صباه .. و.. رقته .. و.. انسيابه

يغيب .. وابن ادم به العمر محدود
يخاف .. من عمرٍ .. يجي مايهابه

لو قال افرض لو اجي وانت ملهود
والله لانهب فرض قوله نهابه

باكر يضيق .. ويمتلي .. شوق .. و .. وعود
يحتاجني لا استاحش من الكئابه

الشامخ اللي لابته ماكر الجود
واردى بني عمه ردي الذيابه

ليا انثنى من دون تلويحة النود
ياعل ماتملى عيونه قرابه

وليا سمعت انه من البعد ب يعود
ياعل ماتبكي عيوني شبابه

© 2024 - موقع الشعر