أي خدمه كلمتن لفضها سهلن صعيـب - عجب المرزوقي

أي خدمه كلمتن لفضها سهلن صعيب
والكثير من البشر لاطرت له قالها

كلمتن يلفظ بها أللي مايدري وش تجيب
ماحسب مطلاعها ولا حسب مدخالها

وذي تراها كلمة تكسر العظم الصليب
والغبي يغرها والذكي يصحالها

واللذي يقولها من فراغ أمره عجيب
يمكن أيحمل بها بعد ما حوبا لها

كم وكم من خاطيه فالزمن هذا تصيب
وكم وكم من صايبه والخطا في جالها

لاتغارب شي مابه على الدنيا غريب
الغريب إن الغرايب تزيد أشكالها

وأنت ياللي ماتعرف الشروق من المغيب
كان ما أنت بقد كلمتك لا يوحالها

من فتح بابن مقفل يحصل له طليب
ينشبه لين السوالف تطول أحبالها

ولو ينادي فالبشر مايحصل له مجيب
كل واحد في البشر غلطته يشتالها

ذا جزا اللي مايقيس البعيد من القريب
كلها عنده سوا قصرها واطوالها

© 2024 - موقع الشعر