ألاياللي تسبون الشباب - عجب المرزوقي

ألاياللي تسبون الشباب أهل اللحى مخطين
خطيه والخطيه من يخاف الله ينكرها

ليا صار الشباب أهل اللحى بنظاركم غاوين
أجل سنة محمد عند من دقنة يصنفرها

او اللي يسحب اثيابه على دربه مدى شبرين
أوجيهن غيرت سنتك ياربي تغيرها

او اللي يشرب الدخان ويدوج مع الماشين
من المغرب لين الفجر وعيونة مسهرها

أو اللي لاهين فالوقت ومغفل مع اللاهين
وجلسة لعبة البيلوت دايم مايغادرها

أواللي يقضي الاوقات دايم في قفى المقفين
يسب الخلق غايبها وميتها وحاضرها

حريصن فالقشر ومهملن جملة شروط الدين
وليا منك نصحته للهدايه قال خابرها

يقول الله غفورن يغفر الزله عن الساهين
غفر لام الكباير ذنبها ويضا كبايرها

صحيح الله غفورن يغفر الزله جزاء الجازين
ومن يستصغر أذنوبه ترا ربه يكبرها

صحيح الله غفور ويسمع من أعباده الداعين
ولكنه شديد أعقاب والا ذي ماتذكرها

ترا من خاف من ربه لزومن يذكر الثنتين
ويحسب للندامة والسعادة قبل يخسرها

ترا الدنيا وما فيها أظلالن منتهي ذلحين
ولو تعيش مئة عام كنه يوم فآخرها

تمر وتنتهي سرعه وحنا في الامل باقين
نهد احلام بالتفكير وأحلامن نعمرها

وتاتي ساعتن تجل جميع احلامنا لاحين
نحصلها بيومن يجمع أولها مع آخرها

أجل ياللي تمصخر باللحى واهل اللحى مسكين
نهار الحشر تحمّل لك ذنوبن منت قادرها

مدامك ماتحب أهل التقى بالعون حضك شين
ترا نفس الفتا مع من تحب الله يحشرها

لكن أعرض عن أعراض البشرمالك وراها دين
وخل أحسابها عند اللذي يعلم سرايرها

ترا هاذي نصيحه والنصيحه تكفي الصاحين
وأظن أهل العيارة للهدا مأحدن بجابرها

ترا راع العير لو ما يحصل للعير هاوين
لك الله يارجالن ماتعير ما يعيرها

لكنه فاضي وحصل سواته فالبشر فاضين
وحدّرها معه فالنار سبعين الف حدّرها

وأعود لمن مشى سنة محمد جعل فاله زين
رجالن تنصر السنه عسى المعبود ينصرها

أرجالن لجل نصرة دينها تعرض عن اللاغين
ولا تحسب أحساب اللي يبى يحرق مشاعرها

علامات الهدى فأهل الهدى مثل الشعاع أتبين
مثل شمس الضحى وسط السما مأحدن يخاشرها

ترا ذولا أحفاد الرسل شمعة صفاتن باقين
منارن للهدا ووجيههم ربي امنورها

وناسن تلتبس ثوب الهدا بالكذب حين وحين
نعرف أهل الرياء وأهل المقاصد من مناظرها

لكن سيروا بعون الواحد اللي للعباد أيعين
ولاتهدم بيوت الدين دام الله معمرها

ولو حاول حليل قوم يقطع سكة الداعين
يحصل عاقل أيرده عن أعلومن يبربرها

أنا أقوله وانا مقصر لكن أذكر الثانين
ومن لايستحق السب نفسه مانكدرها

ترا من لاقدر يمشى مثل ممشى الكرام أيمين
لزوم يقدّر أهل الخير وأقل شي يشكرها

© 2024 - موقع الشعر