شباب في رحله على مايقولون
مطارها خارج حدود التقيد
ماتلتزم بشروط مذهب وقانون
وركابها كلن يحب التسيد
صقهان مدري للخطاء مايشوفون
كلن حسب رغبة مزاجه مسيد
عنوانها عادي وممتاز مغبون
عليه تال الوقت مقبول سيد
ياهيه ياللي فالمذاهب تخوضون
الرجل في مذهب اجداده مقيد
مذاهبن تطغى على كل قانون
في طاعه الله حافظ السلم جيد
من صانها في كل الحوال مصيون
يحفظ وقاره عن عيونن تصيد
يشوم ويشيم من اللي يعرفون
ان العوايد عيب منهم اتبيد
حنا عرب وسلومنا ملك واحصون
مذاهبن على المذاهب تسيد
اوتاد بيتن ماثبت غير باركون
قواعدن تفرق سعد عن سعيد
هويتن يبرز بها كل دندون
وتحرم على اللى ماله اصلن مشيد
الحر وابن الحر فالطيب مقرون
والعبد طبعه طبع جده اسويد
مار الشباب اليوم صاروا يساوون
حجم الجمل ساووه مع القعيد
للعولمه مالو عساهم يخيبون
راع الفوايد وش يبى بالتفيد
ان مانقص من مالهم مايزيدون
حقيقتن والها النشاما اتايد
وان قلت للي يحرفون الدركسون
عن سكة الاجداد ليش التحيد
قالو قديم وفالتقاليد مرهون
معنا البس اثياب الحضاره وعيد
قلت ايه مير الثوب يحتاج صابون
ماجاز لي لبسه لو انه اجديد
علي ثوبن قيمته تازن الكون
وقدره بقلبي فالحياه ايتزيد
يسدني عن لبس صاحي ومجنون
فالسلم قيدني وفيه اتقيد

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر