نــجــــــمــــــــــــــة الـــصــــبـــــــــــــــــح - عبدالله مرزوق المرشدي

يانجمة الصبح عاليت المراقيبي
ياعزة الشم في تفكير رعبوبه

يامصدر الشعر في هاجس مكاتيبي
يامنية القاف ياملحه ومطلوبه

ياقمة العقل ياست الرعابيبي
ياعفةٍ في بياض الطهر مكتوبه

يا آية الحسن ياوصف التعاجيبي
في صورةٍ من بنات الحور مسحوبه

رقه ودقه دلال وحسن تاديبي
غنج ودلع منتقى من راقي اسلوبه

في هامة الزين لك حسبه وتحسيبي
بين العذارا لحالك بس محسوبه

ياشمس في دنيتي تشرق ولاتغيبي
تشهد على مشرقي وتنور غروبه

ياقبلة البيض يكفي منك تعذيبي
خافي من الله يجيك بذنبي عقوبه

مدري متى معك تصفيلي مشاريبي
واشرب قراح الهوا من صافي عذوبه

لولاك لولاك مازادت تناحيبي
ولاكتبت الشعر لعيون محبوبه

ولاعرفت الهوا قبلك ولا اجيبي
شوقٍ دعاني على زاده ومشروبه

انت الذي بالخفوق تعيد ترتيبي
حبك يشوش على التفكير باعجوبه

مافيه غيرك توفي لي مطاليبي
كل العذارا بهن تظليل وكذوبه

استخسر البيض في طبعي وتهذيبي
واستخسر الشعر في غيرك يجي صوبه

كم لي وانا اشوف لي كذب وتلاعيبي
في عشرة البيض والعشاق منكوبه

بس انت غير البني يامنبع الطيبي
فيك الخصال الحميده جات مسكوبه

اصلك وفصلك وكلك مني قريبي
احس معك الحياة تصير مرغوبه

يابنت من طال عمره بالمواجيبي
شيخٍ ولد شيخ ثوب العز من ثوبه

ماودي اغوص في مدحه ويغديبي
عن قصد شعري واخلي مدحتي دوبه

بالمختصر كل شيٍ فيك يسريبي
في بحر وصفك وازود القاف ماجوبه

بس ارحم الحال يكفي لاتهذريبي
لاتترك القلب للاشواق لعبوبه

ادري بما في خفوقك وانت تدريبي
والكل منا يدل الثاني دروبه

اختاري اللي تبي من عقب تجريبي
مانتي على الحب والتجريح مغصوبه

وان كان غبتي رقيت بشمخ النيبي
واعلنت للبيض عن طرد الهوى توبه

تميت قافٍ سليم من العذاريبي
لعيونك السود طوله بس عذروبه

© 2024 - موقع الشعر