اخر رسالة ود تكتب يميني
قبل الرحيل المر قبل الحسايف

ارجوك ياعذب اللمى سامحيني
ما دام انا من سيرة الحب خايف

ناديت من قلبي عسى تسمعيني
لاتحسبيني يوم صديت عايف

صوتك يسبب مشكله صدقيني
حتى ولو بين القلوب الولايف

اقولها من جد بينك وبيني
ياهو مصيبه همس ذيك الشفايف

لو تنطقي حرفين تسحر فطيني
وش لون عاداهل العقول الخفايف

حسنك سلب عقلي وبيح كنيني
ماعدت غيرك ياريش العين شايف

الزين لفك من شمال ويميني
قليل في حقك حسين الوصايف

مافيك عيب وكل مابك حسيني
فيك الحلا والحسن طاغي وكايف

طلبت ربي في فراقك يعيني
ماعاد بي حيلٍ يطيق الكلايف

وان كان جيتك جنبي واتركيني
لاني اعرف القلب يمك مهايف

لاتذكرين الحب لاترحميني
خليني اصبر تاليتها خفايف

حتى بمنامي حاولي ماتجيني
ردي طيوفك لاتجيني ردايف

واذا صحيت انسى عناي وحنيني
واحاول انسى حب ناب الردايف

حتى ولو جوي تعكر ..يزيني
واعيش جوٍ مثل جو المصايف

هذا قراري راضيٍ مايجيني
من عقب عديت الطوال النوايف

شم الجبال اللي حجاها حصيني
عديتها وهموم قلبي لفايف

في مرقبي راجعت ماضي سنيني
واخذت عبره من ليالٍ طوايف

درب الهوى يابنت ماله ضميني
ياكثر مابه من علوم وطرايف

في سيرة العشاق سرٍ دفيني
تلقى بعضهم مع بعضهم حلايف

نهارهم مابين شوق ونيني
وليلاتهم مابين ساهر وحايف

حال الهواوي مثل حال السجيني
دايم على خده دموعه ذرايف

الشوق جمره بالحشا تبتليني
تحرق معاليق الضلوع النحايف

ابيك والله وادري انك تبيني
بس اجزمي خلاص ماني برايف

يكفي دلع بالله لاتحرجيني
قلت الك انا من سيرة الحب خايف

بودعك يافاتني واذكريني
اذا قريتي هاجسي بالصحايف

هذا جوابي قدري و اعذريني
وانسي مع الايام ماكان طايف


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر