الحسايف

ما فيه شيٍ يستحق الحسايف
دنيا العناء ما تستحق الحسوفه

خلك على دينك حريصٍ وخايف
من ضاع دينه زاد همه وخوفه

اهتم بأرحامك وبر الولايف
من يقطع الأرحام بقعى تلوفه

لأمك وأبوك تصير خاضع ورايف
أمك ترى أمك تستحق المروفه

لا تلتفت للي مع الناس طايف
العبد رزقه ياخذه ما يطوفه

لا تلحق النفس الشقيه كلايف
استهد بالله ما تفيد الكلوفه

ترى الأمور تصير باكر خفايف
والصعب بإذن الله تزايد خفوفه

سدد وقارب للهدف وأنت شايف
لا تطرد اللي بالنظر ما تشوفه

لا يخدعك منظر به الحسن زايف
كم منظرٍ تجذبك ظاهر زيوفه

لا تطرد المقفي ليا صار عايف
اللي يعوفك يأبن الجواد عوفه

واحذر تطيح بحب ناب الردايف
لايسحرك لاشفت نابي ردوفه

اللي عليه من المشاريه حايف
حلال قومٍ كل ذيبٍ يحوفه

ابحث عن المضمون واف الوصايف
لا تنخدع باللي ظهر من وصوفه

خلك من الله دايم الدوم خايف
و اللي عدا ربك حرامٍ تخوفه