الكذب

من كثر ما قلّبت فالبيض والسود
شربت من كاس الحلى والمراره

لقيت لي حبلٍ من الكذب ممدود
من فوق نور الصدق مرخٍ ستاره

دايم على بعض العلاقات مشدود
ينفض على صدق التعامل غباره

حب المصالح صار ما فيه منقود
صارت فنونه من عروض التجاره

صدق المشاعر راح ما عنه منشود
صار التلاعب بالمشاعر شطاره

واللي عرف فنّه على غيره يزود
حتى جنا الأرباح من حب جاره

باب التفاهم دون مصلوح مردود
والصدق بين الناس ضيع مساره

دنيا العنا مابين حاسد محسود
تلعب على الحبلين فن ومهاره

اللي نزل فيها بعد وقت مطرود
يرحل ويلقى قدام عينه قراره

مثل البشر والموت صايد ومصيود
الموت رامي والمخاليق شاره

ما يعرف التفريق سيّد ومسيود
ما يعرف إلا كيف يأخذ بثاره

يالآدمي فكر ترى العمر محدود
لاتترك الأيام تمضي خساره

الجسم وسط القبر مطعوم للدود
لامن قضى المقسوم عقب اختباره

حاول توّفي بالعمل كل مجهود
اخلص ترى المجهود تجني ثماره

مالك ومال الكذب ماهوب محمود
مالك وماله لاتقرّب لكاره

تراك عبدٍ في تصاريف معبود
الحكم حكمه والمنازل دياره

وصلاة ربي عد ماهفهف النود
على نبيٍ جاب دين الطهاره