نصيحة شاعر - عبدالله مرزوق المرشدي

ان كان تبغى العلم جاتك هديه
دام النصيحه حق تشرى وتنسام

من شاعرٍ ساقه لدينه حميه
وده يعم الخير وتعم الانعام

هديةٍ مامن وراه جزيه
اسمع ترى وقت الملذات مادام

تب لله اللي عالمٍ بالخفيه
وجنب عن دروب المعاصي والآثام

اكثر من التسبيح واقرا التحيه
واستغفر المعبود خلاق الانام

صل الصلاه وحج واذبح ضحيه
وصم رمضان وزك وارفق بالايتام

خلك بفعل الخير كفك نديه
وبوالدينك بر واخضع للارحام

احفظ لسانك لايجي منه اذيه
لاتتركه في عرض الاجواد سوام

احرص على اهل الخير واهل الحميه
خلك مع الاخيار زاكين الاذمام

ترى الخوي يمشي بدربه خويه
اما ورى والامع الركب قدام

ماتنتهي لذات نفسِ شقيه
واللي يطيع النفس لاطاح ماقام

اغنم حياتك قبل يوم المنيه
ترى العمر لو طال تفنيه الايام

فيما مضى كسبت سيه وسيه
تقضي نهارك نوم والليل باجرام

مع شلة بالغيّ دايم سويه
على دروب الشر جايلها ازحام

عن بعضها ماتفترق لو شويه
تضحك وتلهو بالمناكر والانغام

مثل الحبايب لكن بخبث نيه
ما يأمن احدكم خويه إليا نام

وان طعتني تلقى حياةٍ رضيه
ترتاح من عيش التعاسة والاوهام

تلقى السعادة والحياه الهنية
اذا مسكت الدرب واحسنت الاسلام

قلته وانا اخشى من دروب الخطيه
لوكان قلبي عن دروب الهوى شام

وختامها صلاة رب البريه
على النبي ماهب ذعذاع الانسام

© 2024 - موقع الشعر