شاعر علم وانته من البيض مجمول

ياشينها لاصرت واقف لحالك
على طريق مايمره ولا زول

تقول هالك وانت مانته بهالك
مالك جدا ياكود ترديد يحول

هذا ترا حالي ولا هوب حالك
لنك من الاحباب منته بمعزول

كلٍ يبي عرفك ويبغى وصالك
من جاك روح ياهوى البال مشغول

وانا بفكري مايفارق خيالك
كنك بعقلي دايم تصول وتجول

ماقول الا جمل الله حالك
خل الذي فالقلب ماودي اقول

ماودي اوصف ماخفى من جمالك
اخاف وصفك لابدا يسلب عقول

لكن ابوصف حال من جا قبالك
اذا نظرك بنظرته عرض في طول

لامن قلط واحرفت يمه دلالك
حتى ولو ماذاقها راح مذهول

تبتعد عنّه برجله مشالك
حتى ولو دربك على طول مجهول

وان كان حظه حرره من حبالك
يروح من عندك بلا عقل مسطول

تدري عشان ارضيك واسر بالك
اسمحلي اوصف شي بالعقل معقول

ريان عودك مع حلاك ودلالك
غير العيون السود والريق معسول

والخد برقٍ شع في ليل حالك
يضوي على نجلٍ بها السيف مسلول

الزين في يمناك والا شمالك
الا انت كلك صرت لزين مدلول

ماهمني لوزاد فيني هبالك
احسن لي ابعد قبل لاصير مهبول

اجرح وسو اللي بفكرك بدالك
بس انتبه بالله لاتطري حلول

لاني ولد عمك ولا ولد خالك
صدفه تلاقينا على غير محصول

ماني بعبدٍ لك ولا من عيالك
شاعر علم وانته من البيض مجمول

روّح ترى دربك من اليوم سالك
من الآن ماني عن مودتك مسئول

ماقول لامن رحت ادور بدالك
اقول ياجعلك تهنى على طول

تراي من عقبك قطعت المسالك
واخذت لي تطعيم عن كل مكحول