غلطة الشاطر - عبدالله زومان

سريت بعالم الماضي. بعالم ذكريات أمسي
أنوّخ عنده ركابي.. وأنا كلّي أمل باكر

أراجع صورة اللي راح.. أقول أرجوك يا نفسي
تناسي وإنسي اللي فات.. لا ترجين له خاطر

تغشّاني هموم الليل.. فيها أصبح وفيها أمسي
أبشكي همّي القاتل.. وأبشكي حظي العاثر

صحيت.. وصاحت الذكرى.. قبل ما تشرق الشمسي
على عهد الوفاء اللي ذاع.. على عهد الوفاء الغادر

نزفت.. وكلي جروحك.. وبحتك وأنت في همسي
ألا يا كبر جرحك بي.. وانته للدواء قادر

ما هو جرح ولا جرحين.. ثلاثه.. لا لابل خمسي
أوقف جرحي الماضي.. ويصرخ جرحي الحاضر

أغيب عن الوعي.. ذكرى.. وفي شاطئ الهموم أرسي
وأرحب في قدوم الليل.. وأطفي نورك الباهر

أفضّل أبتعد وأرتاح.. من ذكراي.. من هجسي
هلا بصحراء الجفاف.. ولا سماك الغايم الماطر

أنا ما أنسا معاناتي.. بكيفك لو تبين إنسي
وهذي غلطتي وياك.. هذي غلط الشاطر

© 2024 - موقع الشعر