الصدر ضاق ودلبح النجم لغياب
وأغلق لنا باب الليالي الجميله
والرجل عندي ساقها رب الأرباب
تصعد على ذيك الرجوم الطويله
انزل من المرقاب وأصعد لمرقاب
وأخايل البراق وأجزم بسيله
ويا ما حلانه شوفت جبال وهضاب
بأرض خلا وعره ولا ينوتيله
رفيقك اللي للمسافات نهاب
جيب جديد وتو يدخل مديله
من وارد اليابان للصعب ماهاب
صفق الحصا يطرب ليلفر ويله
والطير رفرف بالجناحين لعاب
شره عل خرب الحباري يكيله
في موقع فيه أم سالم له إطراب
وأرانب تستاهل اللي يعنيله
وجروم رمت ربحته والهوا هاب
عده عطر باريس..لمن ينتشيله
وأصلح الفنجال والفكر لي طاب
وانظم جميلات البيوت الجزيله
ويا ما حلا شوف النشاما على الباب
ميازهم يجلي الهموم الثقيله
تنطحهم الذله وكلمات ترحاب
والعود الأزرق للوجيه الفضيله
ذولا بني عمي ولافيهم عفن يدينه بخيله
ما بينهم عفن يدينه بخيله
معهم سواليف لها الروح تنساب
وقصيدة تشفي القلوب العليله
هذي أماني والأماني له أسباب
من بعد ما شفت الأمور الجليله
شفت العجب يا وقت نقراه بكتاب
بين السطور..العمر تاليه ليله
الليل جاب الليل والصبح وش جاب
غير التقاليد الغريبه حصيله
الحر الأشقر خايف يقلب غراب
ويمكن اسود الغاب تصبح ذليله
حتى حصاني الدار نبتت له أنياب
وحت المره صارت تخوف حليله
ويا عزتي للقلب بالهم منصاب
وأصبح بأعلا الصوت يا من يشيله
وأستغرب أن النجم بالصبح ما غاب
وأثر النجوم الغايبه ينبكيله
وياشين تجريح القرايب والأحباب خص ليا جالك حديهم بميله
يجرحك في كلمة وللشر شباب
وبين البشر يركض لشب الفتيله
نقال هرج وساعي بين الأقراب
عل الفتن والحسد يومي شليله
لاصار ابن عمك للأعراض شضاب
فارس كلام وباللقا ما دريله
ودك مثل هذا تزفه مع الباب
هبيت وجه ما كسبت النفيله
ويا عزتي لك بالوفا مالك أصحاب
ضاع الوفا وضاعت سلوم القبيله
كيف السلوم الطيبه صارت أغراب
تعايبونها أهل القلوب الهبيله
عابوا سلوم أجدادنا اللي به اداب
قالوا بدو والبدو خيل أصيله
ما هي بداوه لكن أمجاد الأعراب
اهي الأصل واللي واها تزيله
ما هي تخلف لكن سلوم شياب
أهي الشيم تبحث عن اللي يشيله
واليوم جيل صار للغرب خطاب
يخطب وداد الغرب في كل حيله
هذي شيمهم كله أكذاب بأكذاب
في تركها جدوا بكل الوسيله
حتى الحياء هلوا عل قبره تراب
انهوه ناس ما تعرف الفشيله
ولا هي غريبه مدحت الطيب يا عقاب
مار القهر كيف الرد ينحنيله
الطيب ناله راعي الطيب لو غاب
أبوك أبو منصور عرب القبيله
دايم يبي شوف الجماعه على الباب
من طيب نفسه نفس غيره ثقيله
اللي نصاه بحاجة عاد ما خاب
عز الله أنه فزعة اللي يجيله
ما يذخرالمجهود من دون الأقراب
وحتى البعيد ليا نخاه بعنيله
أنا أمدح الطيب بشعري ولا أهاب
وإلا الردي يموت محد دريله
وبالله ياللي ما تخيب لطلاب
يا واحد كل الملا تلتجيله
انك تعين اللي حياته به أتعاب
من كثر ميلات الزمن هد حيله
لو طاب وقت أكثر الوقت ما طاب
والحال يا مولاي صارت عليله
أبي الفرج يا رازق الطير والداب
ويا محيي أمات بموته محيله
ويا سامع النجوى وعلام الأغياب
ويا مرسل خير البشر نهتديله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين