البارحه يامحمد ليلتي ليله
ماغير افكر واحسبها واقلبها

يومي تواجهت مع من يلبس الشيله
قمت الهواجيس اشرقها واغربها

سبحان من جاد في صنعه وتمثيله
شقت عيونه تقول السيل ضاربها

قال التفت في يديني مابها حيله
دام المقادير ماتحمد عواقبها

قلت العسر يمكن امع الوقت تعديله
الا اذا عشرتي منته براغبها

قال احسن الظن شوف الروح وشهيله
وش فايدتها اذا منتا معذبها

ماهو بالاول تحول صعب تحويله
وتكفا ابيك الحقايق ماتكذبها

قلت الحكي مكثره والفعل عزيله
ماشفت انا في عيوني يامغلبها

دامك تقول الغلا ياصعب تبديله
علل هذيك الخيانه وش سبايبها

قال اعتبرها جهل اوطيش او ميله
مثلك يبي يدمح الميله ويشطبها

ابنشدك عن حقوق المزن وسهيله
لاوافق الوسم ماتحمل سحايبها

قلت اتحكي في سحابن ما مشى سيله
دنياك هذي كفاك الله مصايبها

والموت لا من نوى يرسل مراسيله
ماحسب اصغارها والا لشايبها

وانا معه يامحمد خذت تعليله
تقريب ساعه اشرقها واغربها

بس الوكاد اعترفلك ليلتي ليله
من كثرت الشوق ضعنا في طلايبها


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر