يا خليلٍ

يا خليلٍ ما يراعي للخليل
كل ما أطلب منه مطلوبٍ محال

قلت مرّه بس عطني سلسبيل
ريقٍ أحلى من عسل نحل الجبال

قال لا والله محال ومستحيل
ما تمس شفاي لشفاه الرجال

قلت كيف الوصل قال حلوم ليل
لحظةٍ تسعد بها طيف الخيال

قلت يا قتال ما ترحم قتيل
مغرمٍ بك ما يبي غيرك بدال

قال لو دمعك على خدك يسيل
أعرف انه مكر حبك واحتيال

قلت ما باقي لنا غير الرحيل
قال لا والله ما أحب الانفصال

قلت ويش الحل يا سمر اجديل
قالت أحسب عشر عشرات وتعال

قلت عيد النحر ما غيره بديل
ثالث هلالٍ وعشرٍ من هلال

قالت أيه الناس في شهرٍ فضيل
ولا يصح مغازلة يا بن الحلال

قلت في الموعد الى بيتك نجيل
قالت أشبعكم ضحى نحر الجمال

ورحت مدري ويش قلت وويش قيل
بيننا ما صار زبده للجدال