الاوله رحمتك يالله يا الله
يا واحدٍ كل المخاليق ترجيه

رب ٍ كريم وما خسر من ترجاه
مخازنه في أرضه وتمطر مناشيه

نسجد عل السبع المسماه لرضاه
عفوه وغفرانه مطاليب داعيه

اللي بيومين السماء شيد بناه
وسبع الاراضي في أربع أيام با نيه

بحور وأنهار وجبال مسماه
وأرض وسحاب ميت الارض يحييه

سماء ولليل به نجومه وقمراه
وفجرٍ بدت شمسه وبانت مماشيه

لليله نهاره كل واحد ومجراه
يسعى مع أيامه وترقد للياليه

خلقه كثير ويعجز اللي بيحصاه
والله درى بحساب خلقه ومحصيه

كل كتب رزقه وموته ومحياه
ما سج عن خلقه ولا هوب ناسيه

والادمي بالعقل والميز خلاه
خليفتله في بحوره وأراضيه

لك الزعل يا مغضب الله بمسعاه
ولك الرضى يا طايع الله ومرضيه

يا صاحبي افهم كلامي ومعناه
مثلك فهيم ولا جهل في معانيه

لا يزعلك يوم ٍ كرهته ومبداه
ولا يفرحك يومٍ تسرك مباديه

الخير في ما ختاره الله وما راه
وما كتب في عالي جبينك بياتيه

وأعرف ترى الدنيا متاع وملهاه
والضيف لابده مسافر لاهاليه

عينت لي هذا وهذا وهذاه
وعينت لي من كان باسمه تناديه

هذا تغدا به وهذا تعشاه
والرابح اللي راضي عنه واليه

وتراك مع دربه وماشي بممشاه
احذ ر زمانك لا تغرك تواليه

محضوض ياللي جملة المال زكاه
و محضوض ياللي فرض ربه مصليه

ومحضوض يا من كمل الصوم وأوفاه
و محضوض يا من حج فرضه وقاضيه

ومحضوض يا من أدرك أمه وأباه
و رجع لهم دين ٍ بعنقه و أياديه

والويل لك يا قاطع ٍ في دنياه
من يقطع أرحامه ترى الله قطع فيه

الخير للي دايم الخير مبداه
والشر للي دايم الشر مبديه

عمرٍ مضى من عمرنا واستفد ناه
تجارب أيامه كفت عن بواقيه

والناس قالوا كل وادي ومجراه
تعرف مواريده وتعرف مجاريه

كل على شكله وشبهه وحلياه
ينزل منازيله ويمشي مماشيه

احدٍ إلى العليا سريعه مطاياه
واحدٍ على ما قيل يتبع مشاهيه

كل على كيفه وشفه ومنحاه
تارد وتصدر فوق عده ضواميه

وعد قراح وعد ما ينشرب ماه
لاكن يا جد من يغرفه بما فيه

والطيب لأهل الطيب ما به مراواه
وإلا الردى لاهل الردى ما تخليه

والحر يعرف من مواكير مجناه
والبوم بوم وجاذ باته مجانيه

والرجل كأنه ما يدلنه أرياه
ياخذ من أهل الرأي راي يقديه

وبعض العرب يدبلك من كثرة احكاه
كنه وكيل أدم على ذراريه

هذا ومثله لا تعرض لمنحاه
خله يروح وياجد اللي بيرضيه

والصبر في بعض المواقيف ما حلاه
والا الغضب ما هيب تحمد قوافيه

وشجاعة على الخطا دوم مبناه
ما من وراها الا كثير المشاريه

العاقل اللي خذ أموره مداراه
يا خذ مع العقال حقٍ ويعطيه

خصيم نفسه والعرب بالمساواه
عنده ولا يقبل براي يغويه

ومن لا تحمل زلة من د ناياه
أزعل قراباته وفرح معاديه

ومن تابع الغلطات كبرت رزاياه
هذاك يسرح به وهذا يضويه

وترى الثقة بالنفس عزٍ ومنجاه
ومن شك في نفسه ما حقق مناويه

وترى عدوك لو يحسن نواياه
يا سرع ما تكشف عن اللي مخفيه

قدام لايبلاك ولا تبلاه
خله يروح ولا تعرض مناحيه

بادر راع الحسنة بطيبه وحسناه
ومالك ومال اللي كثيره مساويه

وأن شفتلك ناقص فحاول تعداه
نقصه عليه وياجد اللي يباريه

الشامخ العالي ما كل ترقاه
والجرف جرف ولا تتعب مراقيه

والرجل من صيته وطيبه تنصاه
روس الرجال اللي تعرفه بطاريه

ريف الضيوف وعز ربعه ومن جاه
وعون لمن وقته تحده حواديه

ولا ينفع الرجال قولة يا مغناه
إن كان خيره ما تعداء لا قاصيه

وترى عمود البيت ما يرفع أبناه
وحده أذا ما به ركون حواليه

وأختام قولي مثل قولي بمبداه
رحمتك ياللي ما يخيب مترجيه

الشاعر/ عبد الله هادي الدغفلي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر