المطوع بقلبه داخل الصدر فوح - عبدالرحمن بطيحان القربي

المطوع بقلبه داخل الصدر فوح
والمطوع عن اللي داخله ما درى

منك يا اللي بسرك للعرب ما تبوح
لين خليت قلبه قلب عود هرى

من تصبح بوجهك وجه يومه صبوح
اجمل وجيه من يمشون فوق الثرى

حبة الخال تلعب فوق خدك مزوح
وانت خدك مثل براق ليل سرى

يجذب المسني الضميان لا اقبل يلوح
يقرب شوي وشوي ايتفاهق ورى

ما يلوم المطوع فيك قلب نصوح
باع من باع والا يشتري من شرى

الخواطر تواردني موارد شفوح
بين وجه الرجا والياس فيك اخشرى

لا تخلي حمام الورق حولي ينوح
واتهيض ويطري طاري ما طرى

وارفع الصوت واغني بصوت بحوح
وازعج اهل البلد واهيض اهل القرى

امتلى خاطري لك شوق واصبح جروح
وانت منك وعليك وفيك رد البرى

خاطري فيه شي وفي حياتي طموح
ان دروا بي ترا وان ما دروا بي ترى

ادعج غنج
الشاعر/ عبد الرحمن بن بديع الدرعاني شاعر شاب له قصائد جميلة يمتاز بعذوبة اللفظ وجزالة المعنى.. نقرأ له سوياً هذه القصيدة الغزلية:

مشيت في الاقطار بالعرض والطول
وعرفت فحواها بعيد وقريبي

اجمل طبيعة شفتها في اسطنبول
واجمل ملامح شفتها في حبيبي

حبيبي اللي يعطي الهرج معسول
الذمن طعم العسل والحليبي

هرج العرب لو زاد ما هوب مقبول
وهرجه يداوي علة في قليبي

ابو ثمان لعج كنها لول
انا اشهد ان في الناس شكله غريبي

ادعج عنج مردوف راوي ومعزول
مدري متى ربي يحطه نصيبي

وان جابه الله قلت يا هول يا هول
حل الفرج من دون شك وريبي

باصير الى كني على الناس مسئول
والا وزير مثل غازي القصيبي

والله احبه حب ما هوب معقول
حب يخلي فروة الراس شيبي

وافز لا منه مشى نوي الزول
احسبه زوله جعل ربي حسيبي

المشكلة حبي مع الزين مجهول
اشرب عنا حبه وهو ما دري بي

لكن قولوا له من الحول للحول
ابكي على لاماه واشق جيبي

هذي رسالة واصدق الناس مرسول
عطه الرسالة وانصرف يا نديبي

© 2022 - موقع الشعر