يا الله يا كاسي عر الأرض بالريف - عايض سعد المروجم

يا الله يا كاسي عر الأرض بالريف
عقب الدهر تصبح رياض مريفه

يا والي بيدك جميع التصاريف
اجعل ثقال حمول عبدك خفيفه

من بعدها يا اهل الركاب المواجيف
تلع الرقاب ملاعبات السفيفه

هجن على قطع الخرايم مشاعيف
عاداتها قطع الدروب الكليفه

لا جت مع دواخلي مزاليف
تهرف كما تهرف ذياب مخيفه

ما فوقها الاكل باخص وعريف
مفر دين والمزاهب خفيفه

خلوا ركايبكم تنحر هل الكيف
اهل السلوم الطيبات الشريفه

هل نجد سعد الجار لو جار والضيف
ما يلحقه من جور الايام حيفه

الا ويروون السيوف المهاديف
لا جا نهار فيه للشرشيفه

وليا زمت من نجد روس المشاريف
ضلعان نجد الراسيات المنيفه

انصوا الوليد ولا عليكم تكاليف
عز الصديق وسعد ضيف يضيفه

تلقون ضيفانه طروش ومناكيف
يبون امير ما يوصف وصيفه

اميرنا لا عدو اهل المواقيف
يمد يمنا ما عليها نكيفه

نو على نجد العريضة مراديف
ربيع من فاته ربيعه وصيفه

نور كد ما فيه عجه ولا زيف
يروي ضما البيد الضوامي ذريفه

كل الفعول الطيبة والمعاريف
هو في نصيفه والعرب في نصيفه

ذراك يذرينا ليالي الشفاشيف
وجودك ينسينا السنين العجيفه

الله يجيرك من جميع الصواديف
وتبقى ذخر لاهل الحوال الضعيفه

يا مير ما جالي زماني على الكيف
الا مطوعني على امره وكيفه

يا حيف يا وقت الغرابيل يا حيف
يسل في وجهي من العام سيفه

واسلم عدد ما لجلجن بالغطاريف
ورقا الحمام وكل بيضا عفيفه

يوم ان جدك قرر الحكم بالسيف
وساد الجزيرة واصبحت له وليفه

ارسى قواعدها من السيف للسيف
ولبست ثياب العز مثل القطيفه

يسقي ثراه من الروايح طفاطيف
تمطر على قبر الامام الخليفه

© 2023 - موقع الشعر